کلکٹریٹ احاطے میں اسکریننگ کے بعد ہی داخلہ

بہار کے ضلع گیا کے کلکٹریٹ احاطے میں کورونا سے بچاؤ کے احتیاطی قدم کے طور پر یہاں آنے جانے والوں کی اسکریننگ ہوگی۔

ریاست بہار کے ضلع گیا کلکٹریٹ احاطے میں والوں کی پہلے اسکریننگ کی جائے گی اور اس کے بعد ہی داخل ہونے کی اجازت دی جائے گی۔ اس دوران سماجی فاصلے کا خاص خیال رکھا جائے گا۔

ضلع مجسٹریٹ ابھیشیک سنگھ نے ضلع پنچایت راج افسر سنیل کمار کو ہدایت کی ہے کہ وہ اسکریننگ کے لیے اہلکاروں کو کلکٹریٹ میں تعینات کریں۔ تاکہ وہ کورونا سے بچاؤ کے لیے باہر سے آنے والے ہر شخص کی اسکریننگ کرسکیں۔ ہر ہفتے کلکٹریٹ کو سینیٹائز کرنے کی بھی ہدایت دی گئی ہے۔

کلکٹریٹ احاطے میں اسکریننگ کے بعد ہی داخلے کی اجازت ہوگی

دراصل گذشتہ روز ای ٹی وی بھارت اردو نے ایک خبر شائع کی تھی کہ کلکٹریٹ احاطے میں واقع دفتر میں کورونا سے بچاو کے لیے کوئی انتظامات نہیں ہیں، خاص طور سے کلکٹریٹ احاطے میں واقع ضلع ٹرانسپورٹ دفتر کے باہر سماجی فاصلے کے بغیر لگی لمبی قطار، اسکریننگ کے انتظامات نہیں ہونے وغیرہ جیسے معاملات پر ایک خصوصی رپورٹ شائع کی گئی تھی۔

ضلع مجسٹریٹ ابھشیک کمار سنگھ نے معاملے کو سنجیدگی سے لیتے ہوئے کلکٹریٹ احاطے میں اسکریننگ سمیت سماجی فاصلے کا خیال رکھنے اور سینیٹائزیشن کرنے کی ہدایت دی ہے۔

واضح ہو کہ کلکٹریٹ کے ایک اے ڈی ایم رینک کے افسر کی کورونا ٹیسٹ رپورٹ مثبت آئی ہے۔ اس کے باوجود کلکٹریٹ میں احتیاطی قدم نہیں اٹھائے جا رہے تھے۔

ضلع گیا میں کورونا انفیکشن کے اب تک 134 مثبت کیس درج ہوئے ہیں۔ جس میں 40 کے قریب متاثرین صحتیاب ہوکر گھر واپس جا چکے ہیں۔ کورونا انفیکشن کے بڑھتے معاملے کے بعد بھی ڈی ٹی او دفتر میں بغیر اسکریننگ کے لوگوں کی بھیڑ لگی ہوتی ہے تاہم اب کلکٹریٹ احاطے میں ہی داخل ہوتے وقت اسکریننگ کی جائے گی۔