احتیاط و بندش میں عیدالاضحٰی کی نماز

عالمی وبأ کورونا وائرس کی وجہ سے احتیاط وبندش بھرے ایام میں سنت خلیل پرعمل آوری کی خوشی ومسرت اگرچہ گزشتہ کی طرح نہیں ہے لیکن عید تو عید ہی ہوتی ہے۔

بہار کے ضلع گیا میں ایثار وقربانی والی عید کے مبارک موقع پر چہل پہل تو نہیں ہے لیکن رونق ضرور ہے، صبح 5 بجکر چالیس منٹ سے نماز عیدالاضحی کاوقت شروع ہوا اور ساڑھے چھ بجے تک نماز پڑھ لی گئی۔

شہر گیا کی مسجدوں میں عیدالاضحی کی نماز تو ہوئی تاہم چند افراد نے مسجدوں میں پہنچ کر نماز ادا کی جبکہ عیدگاہوں و خانقاہوں اور کھلے میدان میں عید الاضحی کی نماز نہیں پڑھی گئی، شہر کی بہ نسبت دیہی علاقوں میں زیادہ افراد جمع ہوئے لیکن وہاں بھی احتیاط اور بچاو کا ہر ممکن خیال رکھا گیا اور سوشل ڈسٹنس کے ساتھ نماز اداکی گئی اس کے علاوہ شہر میں زیادہ تر افراد نے اپنے گھروں میں ہی جماعت کے ساتھ نماز ادا کی ہے۔

گیا میں نماز کے بعد قربانی کا عمل شروع ہوا اور بکرے کی قربانی کی گئی لیکن ہر بار کی طرح اس بار زیادہ احتیاطی تدابیر اختیار کی گئی ہے۔

لاک ڈاون کی وجہ سے پولیس کی گشتی اور سختی دونوں ہے۔ سڑکوں پر بلاوجہ گھومنے والوں سے پوچھ تاچھ بھی کی جارہی ہے۔

مسلم محلوں کی گلیاں بھی خاموش ہیں، لوگ اپنے گھروں میں رہ کر ہی عید قرباں کے عمل کو انجام دے رہے ہیں اور بذریعہ سوشل میڈیا و ٹیلی فون سے لوگ ایک دوسرے کو مبارک باد پیش کررہے ہیں۔