ریاست بہار کے ضلع گیا میں مخدوم درویش اشرف کے آستانہ سے نہ صرف روحانی فیضان جاری ہے بلکہ یہاں سجادگان کی برسوں کی روایت، تعلیمی و سماجی خدمات، مذہبی رواداری، قومی یکجہتی اور گنگا جمنی تہذیب کی مثالیں بھی پیش کی جاتی ہیں۔
سجادگان کی سابقہ روایت کے تحت بے سہارا لوگوں کی کفالت، غریب و نادار بچوں کی تعلیم کا بیڑا اٹھانے کی روایت جاری ہے۔ لوگوں کے مطابق بلاتفریق مذہب وملت اس دربار سے انسانیت کا درس اور خدمت خلق جاری ہے۔
شہر گیا سے آٹھ کلومیٹر دور حضرت مخدوم درویش اشرف کا آستانہ اور اس کی رسومات کی روایت گنگا جمنی تہذیب کی مثال پانچ سو برسوں سے ہے۔ اس روایت کو ہر سجادہ نے اپنے وقت میں قائم رکھا۔
مخدوم اشرف کا آستانہ بہار کے تین بڑے آستانوں میں سے ایک ہے۔ اس آستانہ کے سجادگان کی خدمت خلق کی عظیم داستان ماضی کی تاریخ میں درج ہے۔ اقتصادی سماجی اور تعلیمی و مذہبی خدمات روز روشن کی طرح عیاں ہے۔
یہ بہار کی پہلی خانقاہ ہے جہاں آج تک کسی بھی طرح کے معاملوں کے لیے چندہ نہیں کیا گیا بلکہ یہاں سے غریب بے سہارا افراد کی مدد یتیم و نادار بچوں کی کفالت و تعلیم کے انتظامات کیے جاتے رہے ہیں۔ خانقاہ کی اراضی اتنی وسیع ہے اور اس کی آمدنی اتنی ہے کہ ہر برس سنی وقف بورڈ پٹنہ کو بیس ہزار روپے بھیجے جاتے ہیں۔ آستانہ بیس ہیکڑ میں پھیلا ہوا ہے جس میں دکان مارکیٹ مسافرخانہ اور کاشت کی بھی زمین شامل ہے۔
بیتھو شریف کے مقامی وجے چودھری کہتے ہیں کہ 'درگاہ سے امن و شانتی اور روحانی فیضان جاری ہے بلکہ یہاں سجادگان کی برسوں کی روایت ہے کہ وہ خاموشی کے ساتھ خدمت میں حاضر ہوتے ہیں بلا تفریق سبھی برادری اور مذہب کے ماننے والوں کے مشکلات کا حل تلاشتے ہیں بچوں کی تعلیم پر اس خانقاہ کا زور زیادہ ہے کبھی ہندو مسلم کا امتیاز نہیں ہے بلکہ یہ بھارت کی گنگا جمنی تہذیب کی مثال ہے۔