دیوالی کے پیش نظر شہر میں مزید رونق

ریاست بہار کے ضلع گیا میں دیوالی کی تیاریاں عروج پر ہیں، بازاروں کی رونق میں اضافہ ہوگیا ہے۔ دیوالی برادران وطن کا ایک عظیم تہوار ہے۔

دیوالی کو روشنیوں کا تہوار بھی کہاجاتا ہے اور جب روشنی کی بات ہوگی تو برقی کمکموں اور دیوں کو کوئی کیسے بھلا سکتا ہے۔ اس دن گھروں میں جگمگاتی لائٹیں گھر کی زینت میں مزید اضافہ کر دیتی ہیں۔

دیوالی کے موقع پر گیا میں بازار سج گئے ہیں، لائٹوں، گھروندا اور سجاوٹ کے دیگر سامان خریداروں کی پسند بنے ہیں۔
فنکار دیوالی کے لیے لکشمی کی مورتی کو حتمی شکل دے رہے ہیں۔ مذہبی عقیدے کے مطابق دیوالی میں دھن کی دیوی لکشمی کی پوجا کی جاتی ہے اور لوگ اس دن لکشمی کی مورتی لاکر گھروندے میں رکھ کر پوجا کرتے ہیں۔
گیا میں لوگ دیوالی کے لیے دیے اور دیگر ساز و سامان کی خریداری کر رہے ہیں۔ دیوالی سے پہلے بازاروں میں چائنیز لائٹ، آتش بازی کے لئے پٹاخے، گھروندا، آکاش دیپ اور فینسی کپڑوں کی خریداری ہورہی ہے۔
دھن تیرس دیوالی پر پیتل کے برتنوں کی بھی خریداری خوب ہوتی ہے، پیتل برتن کے کاروباری دھرمیندر بتاتے ہیں کہ دیوالی کے پیش نظر انہوں نے برتنوں کو فروخت کرنے کے لئے تیاریاں مکمل کرلی ہیں۔
چائنیزلائٹ کے ایک کاروباری منٹو نے لائٹوں کا اسٹاک تو لاکر رکھا ہے، لیکن وہ مایوس بھی ہیں کہ اس بار بازار ٹھیک نہیں ہے۔