District Agriculture Officer ضلع میں کاشت کاروں کو گیہوں اور دیگر فصل کی بیج دستیاب کروائی گئی

گیا ضلع میں ربیع کاشت کی تیاری شروع کردی گئی ہے، گیہوں دلہن اور تلہن کی کاشت کے لیے کاشت کاروں کو بیج اور کھاد کی دستیابی شروع کردی گئی ہے ، ضلع محکمہ زراعت کے افسر نے بتایاکہ ضلع میں متعینہ ہدف کو پورا کیا جائے گا اور بلاک سطح پر نگرانی رکھی جارہی ہے۔

گیا:ریاست بہار کے ضلع گیا میں حال کے گزشتہ برسوں سے کاشتکاری بڑھی ہے ۔ اس کے لیے کاشتکاروں کی مدد محکمہ زراعت کی جانب سے دی گئی ہے چونکہ بہار حکومت میں محکمہ زراعت کے وزیر کا تعلق ضلع گیا سے ہے اور وہ ہر ماہ یہاں اپنے محکمہ کے افسران کے ساتھ جائزہ لیتے ہیں اور ساتھ ہی کسانوں سے فیڈ بیک بھی حاصل کرتے ہیں جسکی وجہ سے کاشتکاروں کو براہ راست فائدہ پہنچ رہاہے۔

محکمہ زراعت کے افسر اجے سنگھ نے بتایاکہ گیہوں کے ساتھ دلہن تلہن اور مکا کی بیچ تقسیم کی گئی ہے ، کسانوں کی رہنمائی کی جاتی ہے تاکہ کسانوں کو فائدہ پہنچے اور وہ براہ راست منافع حاصل کرسکیں۔اس برس گیہوں اور مکا ملا کر 24921 کوئنٹل بیچ تقسیم کرنے کا ہدف رکھا گیا ہے۔ اس میں گیہوں کا بیج 18 ہزار 49 کوئنٹل ، چنا کا 3805 کوئنٹل ، مسور 2241 کوئنٹل، رائی سرسوں 128 کوئنٹل ، مکا 666 کوئنٹل بیج تقسیم کرنے کا ہدف مقرر ہے ، جس میں اب تک دلہن اور تلہن کے بیچ قریب 95 فیصد تقسیم ہوچکے ہیں جبکہ گیہوں کا ابھی صرف 57 کوئنٹل بیج تقسیم ہوسکا ہے۔

کھاد کی نہیں ہوگی کمی

ضلع زراعت افسر اجے کمار سنگھ نے کہاکہ ہدف کے مطابق بیج دستیاب ہوگیا ہے ، دینے کی بھی کاروائی جاری ہے ، یہ سرکاری ہدف ہے جبکہ کچھ کسان مارکیٹ سے بھی بیج لیتے ہیں ، اس وجہ سے اس برس بھی بڑے پیمانے پر ربیع فصل کی کاشت ہوگی ، کسانوں کو سرکاری امداد بھی دی جاتی ہے ، اس برس دھان کی فصل بھی اچھی ہوئی ہے کیونکہ اس بار دھان میں لگنے والا کیڑا نہیں لگا ہے۔

اس حوالے سے گیا کے کسان ٹوٹو خان ، محمد علی وغیرہ نے بتایاکہ محکمہ زراعت کی طرف سے کسانوں کو بیج دستیاب کرایا جارہاہے، کاشتکاری تو مہنگی ہوئی ہے لیکن راحت کی بات یہ ہے کہ مارکیٹ یہاں آسانی سے مل جاتی ہے جسکی وجہ سے انہیں بھاگ دوڑ نہیں کرنا پڑتا ہے ، کاشتکاروں کی مزید مدد کی جانی چاہیے۔