بہار کو نشہ سے پاک بنانے کے لیے ریلی کا انعقاد

بہار کے ضلع گیا میں یوم دستور ہند کے موقع پر بہار کو نشہ سے پاک بنانے کے لیے ریلی نکالی گئی، ساتھ ہی ضلع مجسٹریٹ آفس میں موجود افسران اور ملازمین کو اپنے فرائض سرانجام دینے کے لیے حلف دلایا گیا۔

ریاست بہار کے ضلع گیا میں یوم دستور ہند کے موقع پر جشن منایا گیا۔ سرکاری دفاتر میں سرکاری ملازمین و افسران کو آئین کا حلف دلایا گیا۔ راجندر ٹاور سے بہار کو نشہ سے پاک بنانے کے لیے ریلی نکالی گئی، جس میں اسکولز و کالجوں کے طلبا و طالبات سمیت سرکاری ملازمین و افسران سمیت شہر کے معزز افراد شریک ہوئے۔ اس ریلی میں اسکولی طالبات اپنے ہاتھوں میں بینر و تختیاں لیے ہوئے تھے جس میں مختلف پیغامات درج تھے۔

یہ ریلی ٹاور چوک سے نکل کر مختلف راستوں سے ہوتے ہوئے گاندھی میدان ہری ہرسپرامنیم اسٹیڈیم پہنچ کر اختتام پذیر ہوئی۔ یہاں طلبا و طالبات سے مخاطب ہوتے ہوئے ضلع مجسٹریٹ ابھشیک کمار سنگھ نے آئین ہند کی اہمیت اور اسکی افادیت اور آئین میں ملے حقوق سے متعلق بتایا۔
یوم دستور ہند کے موقع پر ضلع مجسڑیٹ آفس میں سرکاری ملازمین و افسران کو ضلع مجسٹریٹ ابھشیک کمار سنگھ نے ایمانداری اور بغیر کسی امتیاز کے اپنے کام و فرائض کو انجام دینے کا حلف دلایا۔