تصادم میں دو لوگوں کی موت ہوگئی جبکہ تین افراد زخمی ہوئے ہیں، تمام زخمیوں کو ارریہ صدر ہسپتال میں داخل کیا گیا جس میں دو کی حالت نازک ہے، فی الحال ڈاکٹروں نے بہتر علاج کے لیے انھیں پورنیہ اسپتال ریفر کر دیا۔
ہلاک ہونے والوں میں دنیش سنگھ اور مینکا دیوی، شوہر سیتا رام داس کے علاوہ سبھی زخمی تاراباڑی تھانہ حلقہ کے آم گاچھی گاؤں کے رہنے والے ہیں۔
اس حادثے کے بعد قومی شاہراہ پر افراتفری مچ گئی، مقامی لوگوں نے شاہراہ کو مکمل بند کر دیا اور مہلوک کو معاوضہ دینے کا مطالبہ کرنے لگے، اطلاع ملتے ہی جائے وقوع پر پہنچی نگر تھانہ پولس نے مہلوک و زخمیوں کو صدر ہسپتال پہنچایا اور معاوضہ کی یقین دہانی کرا کر جام ہٹایا۔
اطلاع کے مطابق تاراباڑی تھانہ حلقہ کے آم گاچھی گاؤں کے تقریباً آدھا درجن سے زائد لوگ ٹیمپو ریزرو کر کے علاج کے سلسلے میں پورنیہ اسپتال جا رہے تھے۔
مٹیاری کے پاس ٹریکٹر کا توازن بگڑ گیا اور وہ سامنے سے آرہی ٹیمپو سے ٹکرا گیا جس میں موقع پر ہی دنیش سنگھ کی موت ہوگئی جبکہ مینکا دیوی ہسپتال میں علاج کے دوران فوت ہوئیں، اس حادثے کے بعد ہلاک شدگان کے گھروں میں غم کا ماحول ہے۔
