Mirza Ghalib College in Gaya گیا میں مرزا غالب کالج کے پی جی کورسس میں داخلوں کے عمل میں تبدیلی

بہار کے ضلع گیا میں واقع مرزا غالب کالج میں اب پوسٹ گریجویٹ میں داخلہ کے لئے طلبہ کو داخلہ ٹیسٹ کے مراحل سے گزرنا ہوگا ، کالج کی جانب سے کہا گیا کہ اہلیت فہرست پر ہی طلبہ کا یہاں داخلہ ہوگا کل آٹھ مضمون میں پوسٹ گریجویٹ کی تعلیم ہوتی ہے۔

گیا: ریاست بہار کے معروف اقلیتی کالج ' مرزا غالب ' میں تعلیم کے معیار پر پوری توجہ دی جارہی ہے یہاں کالج میں اُردو سمیت کل آٹھ مضموں میں پوسٹ گریجویٹ ' پی جی ' کا بھی کورس ہوتا ہے تاہم اب پی جی کی بھی تعلیم کو معیاری بنانے اور ریگولر کلاس کرانے کی کوشش کی گئی ہے ،پی جی کے سبھی مضمون میں داخلہ لینے والے خواہشمند طلباء و طالبات کے لئے اس بار پہلی مرتبہ داخلہ سے قبل داخلہ و اہلیت ٹیسٹ لیا گیا ہے۔

داخلہ ٹیسٹ کے نتائج کے بعد ہی میرٹ لسٹ تیار کی گئی اور اسی کی بنیاد پر داخلہ لینے کا عمل شروع کیا گیا ہے۔ پروفیسر انچارج ڈاکٹر شجاعت علی خان نے بتایا کہ مگدھ خطے کا مرزا غالب کالج واحد کالج ہے جہاں پوسٹ گریجویٹ میں داخلے کے لئے اہلیت ٹیسٹ دینے کی کارروائی کی گئی ہے۔ ہمارا مقصد تعلیم کے معیار میں بہتری پیدا کرنا ہے۔ صرف ڈگری کے لئے کوئی کورس نہ ہو بلکہ طلباء کے مستقبل اور صلاحیت پیدا کرنے کے لیے کورس ہوگا تاکہ یہاں سے پڑھنے والے طالب علم بھی کسی بھی شعبہ میں اپنی تعلیمی صلاحیت اور قابلیت کی بنا پر کامیابی حاصل کریں۔

اُنہوں نے کہا کہ کالج کی اب کوشش ہے کہ ضلع اور اطراف و اکناف کے طلباء وطالبات ان کورسز کے لیے دوسری ریاستوں کا رخ نہیں کریں، بلکہ یہیں اپنے یہاں تعلیم حاصل کریں اور یہ تبھی ممکن ہوگا جب ہم بہترین تعلیم کا انتظام کریں گے اور اسے یقینی بنائیں گے۔ اس سیشن کے لئے کالج کے اساتذہ اور اہلکاروں نے کڑی محنت و مشقت کی ہے اور سبھی کے تعاون بالخصوص گورننگ باڈی کے سکریٹری شبی شمسی کی محنت اور مثبت صلاح و مشورے سے تعلیمی نظام میں تبدیلی کی شروعات کردی گئی ہے۔

اب جولائی ماہ سے مسلسل کلاس کرانے کا ہدف اور چیلنج ہے جسے ہر حالت میں پورا کرنے کی کوشش ہوگی ، انہوں نے اس دوران کالج کے سکریٹری کی بھی خوب تعریف کی اور کہاکہ وہ معیاری تعلیم کے لیے ہر طرح سے مدد کررہے ہیں۔ کالج کے سکریٹری شبی شمسی نے اس حوالہ سے کہا کہ چونکہ کالج کا اسٹیٹس لسانی اقلیت کا ہے تو ہماری کوشش بھی ہے کہ ہم اقلیتی طبقے کے ویسے طلباء جو کنہی وجوہات کی بناء پر دوسری بڑی جگہوں پر پوسٹ گریجویٹ کی معیاری تعلیم حاصل نہیں کرسکتے انکے لیے ہم یہاں ایسا ماحول پیدا کردیں کہ وہ دوسری جگہوں پر جائیں ہی نہیں۔ اسکے لئے سب سے پہلے یہی کرنا ہوگا کہ ریگولر کلاس اور معیاری تعلیم کا نظم ہو اسی مقصد اور ارادے سے معیاری تعلیم کے لیے تعلیمی نظام میں تبدیلی کی گئی ہے نتائج اچھے برآمد ہو رہے ہیں۔ اُنہوں نے کہا معیاری تعلیم کے لیے پروفیسر انچارج کو کمیٹی کا ہر ممکن تعاون ہوگا۔

واضح ہوکہ کالج کے پروفیسر انچارج ڈاکٹر شجاعت علی خان اور سکریٹری شبیع عارفین شمسی تعلیمی نظام کو مسلسل سدھارنے میں لگے ہوئے ہیں اور اسکے لئے انکی جانب سے کئی تبدیلی کی گئی ہے کالج کی اب کوشش ہے کہ یہاں صرف طلبا ڈگری حاصل نہیں کریں بلکہ ان کے اندر تعلیمی صلاحیت بھی بھرپور ہو اس سے پہلے یہاں کالج میں پوسٹ گریجویٹ کے لیے کوئی داخلہ ٹیسٹ نہیں ہوتا تھا اس بار سے یہ کوشش کی گئی ہے۔