صحت و تعلیم کے معاملے میں بہار پچھڑا، بی جے پی سوالوں کے گھیرے میں

مرکزی حکومت کے ذریعہ قائم کردہ نیتی آیوگ نے اپنی رپورٹ میں کہا کہ 'بہار صحت اور تعلیم کے معاملے میں دوسری ریاستوں کے مقابلے میں انتہائی پسماندہ ہے۔ جس پر کانگریس نے ریاستی حکومت پر تنقید کی۔

ریاست بہار کے وزیر صحت منگل پانڈے اسمبلی میں حزب مخالف کے اراکین کے سوالوں سے گھرے رہے، وقفہ سوال کے دوران تقریباً پندرہ سوالات محکمہ صحت کے تعلق سے تھے جس کا جواب وزیر صحت نے دیا جبکہ متعدد جواب سے اراکین مطمئن نظر نہیں آئے۔

وقفہ سوال کے دوران آر جے ڈی کے رام چندر پورے نے سوال کیا کہ 'کیا یہ صحیح ہے کہ سنہ 2019 میں ہیلتھ ڈیولپمنٹ انڈیکس میں بہار 28 ویں مقام پر ہے؟

کانگریس کے رکن اسمبلی پریم چندر مشرا نے کہا کہ 'نیتی آیوگ مرکزی حکومت کے ذریعے قائم کردہ ادارہ ہے، اس نے جو رپورٹ دی ہے اسے بہار کی حالت کا اندازہ لگایا جا سکتا ہے۔

انہوں نے کہا کہ 'گزشتہ 15 بر سوں سے ریاست میں بی جے پی وزارت صحت کی ذمہ داری سنبھال رہی ہے اسی لیے بی جے پی اس کے لیے جوابدہ ہے۔