Bihar Haj Committee بہار حج کمیٹی حجاج کرام کے استقبال کے لئے تیار : الحاج عبدا لحق

ریاستی حج کمیٹی کے چیئرمین الحاج عبد الحق نے کہاکہ بہار ریاستی حج کمیٹی 2023 میں حج کے سفر پر جانے والے حجاج کرام کے استقبال کے لئے پوری طرح سے تیار ہے۔ گزشتہ دو سالوں سے کوویڈ کی وجہ سے حجاج کرام کو گیا کے بجائے کولکاتا سے حج کے لئے فلائٹ لینے کے سبب بڑی دشواریوں کا سامنا کرنا پڑا تھا لیکن اس بار ایسا کچھ نہیں ہوکا۔ بہار کے عازمین حج کو گیا ائرپورٹ سے سفرحج پر جانے کا موقع ملے گا۔Bihar Haj Committee

پٹنہ:بہار حج کمیٹی کے چیئرمین الحاج عبد الحق نے ای ٹی وی بھارت سے خصوصی بات چیت کرتے ہوئے کہا کہ حج 2023 کے لئے آن لائن حج درخواستیں پُر کرنے کے لئے آج آخری تاریخ ہے۔ حج کے خواہشمند افراد جنہوں نے کسی وجہ سے حج درخواست فارم آن لائن نہیں کیا ہے وہ آج شام 5 بجے سے قبل اپنی حج درخواست آن لائن جمع کرالیں۔ حج درخواست آن لائن کے مرحلہ میں پاسپوٹ کے علاوہ دیگر دستاویزات کی عدم دستیابی میں اسے اپلوڈ کرنے کے لئے اضافی وقت دیا جائے گا۔

انہوں نے کہاکہ وہ آن لائن کئے گئے حج درخواست فارم کی ہارڈ کاپی سبھی منسلک دستاویزات، اصل پاسپوٹ اور سفید پس منظر والی تصویر کے ساتھ بہار ریاستی حج کمیٹی کے دفتر حج بھون پٹنہ میں دفتر ی اوقات میں جمع کرادیں۔ آن لائن حج درخواست کے لئے درخواست دہندگان کے پاس بین الاقوامی پاسپورٹ، کووڈ ویکسین کی سرٹیفکیٹ، سفید پس منظر والی تصویر، کور ہیڈ کے لئے اضافی دستاویز میں بینک پاس بک یا کینسل چیک کا ہونا لازمی ہے۔

ان کا کہنا ہے کہ حج درخواست دہندگان جن کے پاسپورٹ میں بہار سے باہر کا پتہ درج ہے اور وہ بہار کے باشندے ہیں اُنہیں بہار کا باشند ہ ہونے کے ثبوت کے طور پر (1) آدھار کارڈ، (2) ووٹرشناختی کارڈ، (3) گیس کنیکشن کارڈ(تین ماہ قبل کا) (4) بجلی بل (تین ماہ قبل کا) (5) ٹیلیفون بل (تین ماہ قبل کا) میں سے کوئی ایک دستاویز پیش کرنی ہے۔

الحاج عبد الحق نے کہا کہ ابھی تک پانچ ہزار چار سو درخواست منظور کر لئے گئے ہیں۔ امید ہے آخری تاریخ تک یہ تعداد چھ ہزار تک پہنچ جائے گی۔ انہوں نے یہ بھی کہا کہ دو قسطوں کے جمع کرنے کا اعلان ہو چکا ہے۔ آخری قسط کا اعلان طیارہ کے فائنل ہونے کے بعد کیا جائے گا۔ ابھی اس بارے میں ہمارے پاس مرکزی حکومت کی جانب سے گائیڈ لائن جاری نہیں ہوا ہے۔