Madarasas Development ضلع کے سرکاری مدارس میں تعمیراتی کام ہونگے

ضلع گیا میں واقع سرکار سے منظور شدہ مدارس میں تعمیراتی کام ہونگے، محکمہ اقلیتی فلاح نے ضلع دفتر سے رپورٹ طلب کیا ہے۔ مدرسہ تجدید کاری منصوبے کے تحت نئی تعمیر اور پرانی عمارتوں کی مرمتی ہوگی اور اس منصوبے کا فائدہ اٹھانے کے لیے مدرسہ کے نام سے لینڈ پوزیشن سرٹیفکٹ ہونا لازمی ہے۔

گیا:ریاست بہار کے ضلع گیا میں واقع سرکاری مدارس میں ' مدرسہ جدید کاری ' منصوبے کے تحت عمارت کی تعمیر اور مرمتی کا کام شروع ہوگا ، اسکے لیے مدارس سے فہرست مانگی گئی ہے تاکہ کام کرایا جا سکے لیکن اس میں ضروری ہے کہ مدرسہ کے نام سے ایل پی سی ہو ' لینڈ پوزیشن سرٹیفکیٹ ' ہو، اگر جن مدرسہ کے پاس ایل پی سی نہیں ہے انہیں لازمی طور پر ایل پی سی کرانا ہوگا۔

مدرسہ قادریہ بھام نگر میں اس منصوبہ کے تحت کمروں کی تعمیر اور پرانی عمارت کی مرمتی کے لیے جانچ مکمل ہو چکی ہے اور بھام نگر کے مدرسہ قادریہ کی جانب سے ایل پی سی بھی مدرسہ کے نام کراکر پیش کردیا گیا ہے جبکہ ضلع کے بانکے بازار میں واقع منجری کے مدرسہ کی بھی رپورٹ بھیجنے کی کاروائی شروع کردی گئی ہے۔

اس حوالہ سے ضلع اقلیتی فلاح افسر راہل کمار نے بتایا کہ مدرسہ تجدید کاری منصوبہ کے تحت تیزی سے کام ہو رہا ہے اور اس کے تحت جن مدرسے نے درخواست دی ہے ان کی درخواست کاغذات کے ساتھ محکمہ اقلیتی فلاح بہار کو ارسال کردیا گیا ہے ، محکمہ سے جانچ کی ٹیم آتی ہے اور اس کی رپورٹ کے بعد آگے کی کاروائی ہوگی ، اُنہوں نے کہا کہ مدرسہ تجدید کاری منصوبہ بہار اقلیتی فلاح محکمہ کا ایک اہم منصوبہ ہے اور اس کے تحت مدرسوں کی حالت سدھرے گی ، ضلع میں سرکار سے منظور شدہ مدارس کی تعمیر و ترقی پر زور دیا جارہا ہے۔اس منصوبہ کو وزیراعکی نتیش کمار نے 2020 کے اسمبلی انتخابات سے قبل منظوری دی تھی ، اس کے تحت بہار مدرسہ ایجوکیشن بورڈ سے رجسٹرڈ مدارس کو ہی فائدہ پہنچایا جائے گا۔

واضح ہوکہ ضلع گیا کے ڈوبھی میں واقع گھوڑا گھاٹ میں مدرسہ رحمانیہ ہے جو مولوی تک منظور ہے ،یہاں چار اسٹاف تھے جس میں ایک ریٹائر کرگئے ،اسی طرح ضلع کے آمس بلاک میں واقع سیہولی گاوں میں مدرسہ احسن المدارس ہے جہاں فوقانیہ تک کی تعلیم ہوتی ہے ، یہاں چار سرکاری اہلکار بحال ہیں ، ٹکاری میں مدرسہ ارشاد العلوم ہے اور یہاں مولوی تک کی تعلیم تھی لیکن رواں سیشن سے اس مدرسہ کو بہار ایجوکیشن بورڈ پٹنہ نے عالم تک کی منظورِی دے دی ہے۔

آنتی کونچ بلاک میں مدرسہ غریب نواز ہے ،اسکے علاوہ مدرسہ غفوریہ تارا پور گروا اور مدرسہ گلشن طیبہ منجری خرد بانکے بازار ہے ،ان مدارس میں دو مدرسہ کی مالی مدد رکی ہوئی ہے جن میں مدرسہ غفوریہ اور احسن المدارس ہے ،انہیں ایل پی سی جمع کرنا ہے اور کاغذات کے مطابق اپنی پوری رپورٹ جمع کرنا ہے ، ان مدرسوں کے بچوں کو بہار طالب علم حوصلہ افزائی کے علاوہ پوشاک اور فرسٹ آنے والی طالبات اسکیم کا بھی فائدہ دیا جاتا ہے ، اگر مدارس کی جانب سے ایل پی سی کراکر حکومت کو دیا گیا تو آنے والے برسوں میں گیا کے مدارس کی صورتحال بدلے گی ۔