ایوانکا ٹرمپ نے ٹوئٹر پر جیوتی کی خبر کو شیئر کرتے ہوئے اس کی تعریف کی اور کہا کہ ’قوت برداشت اور محبت کے امتزاج کا خوبصورت کارنامہ ہے۔
انہوں نے مزید ٹوئٹ کیا کہ’ 15 سالہ جیوتی کماری زخمی والد کو اپنی سائیکل پر بٹھاکر سات دنوں میں 1,200 کلومیٹر کا سفر طئے کرتے ہوئے اپنے گاؤں پہنچی جو قابل تعریف ہے‘۔
ایوانکا کے ٹوئٹ کے جواب میں سابق وزیراعلیٰ جموں و کشمیر عمر عبداللہ نے ٹوئٹ کیا کہ ’جیوتی نے غربت اور مایوسی کی وجہ سے ایسا کیا ہے جبکہ اس نے 1,200 کلومیٹر کا سفر جوش و خروش کے ساتھ طئے نہیں کیا ہے۔ یہ حکومت کی ناکامی کی مثال ہے، اسے کامیابی کے طور پر پیش کرنا مشکل ہوگا‘۔
واضح رہے کہ جیوتی اور اس کے والد ہریانہ کے گروگرام میں رہتے تھے۔ والد موہن پاسوان لاک ڈاون کے دوران ایک حادثہ میں زخمی ہوگئے تھے جس کے بعد جیوتی نے 10 مئی کو اپنے والد کو سائیکل پر بٹھاکر گروگرام سے دربھنگہ روانہ ہوگئی اور 16 مئی کو گھر پہنچ گئی۔
لوگ اس کی حالت زار کے بارے میں جاننے کے ساتھ ساتھ جیوتی کی جانب سے کئے گئے ہمت و بلند حوصلہ سے کافی متاثر ہیں۔
