Bihar Chief Secretary Haj Review بہار چیف سکریٹری نے عازمین حج کیلئے کیے گئے انتظامات کا جائزہ لیا

چیف سکریٹری عامر سبحانی آج گیا پہنچے جہاں انہوں نے حج امور پر مشتمل جائزہ میٹنگ افسران کے ساتھ کی۔ عامر سبحانی پہلے چیف سکریٹری ہیں جنہوں نے حج آپریشن کے تعلق سے کیے جانے والے انتظامات کا جائزہ لیا۔

گیا: بہار کے چیف سکریٹری عامر سبحانی نے عازمین حج کے لیے کیے جانے والے انتظامات کا جائزہ لیا ہے۔ اس سے قبل گیا ہوائی اڈے پر پہنچ کر کسی چیف سکریٹری نے انتظامات اور تیاریوں کا جائزہ نہیں لیا ہے۔ گیا ہوائی اڈے سے جب سے بہار کے عازمین حج کی پرواز کا سلسلہ شروع ہوا تب سے یہاں وزیراعلیٰ نتیش کمار کی ہدایت پر اعلی افسران کی طرف سے جائزہ اجلاس ہوتا ہے۔

تاہم اس میں چیف سکریٹری شامل نہیں ہوتے تھے۔ اس میٹنگ میں محکمہ اقلیتی فلاح کے پرنسپل سکریٹری شامل ہوتے تھے لیکن یہ ہہلا موقع ہے جب چیف سکریٹری نے حج کی تیاریوں کا جائزہ لیا ہے۔ ویسے پہلے بھی عامر سبحانی ہی پرواز سے چند دنوں قبل ہوائی اڈے پر پہنچ کر جائزہ لیتے تھے لیکن اس وقت وہ محکمہ اقلیتی فلاح کے پرنسپل سکریٹری کی حیثیت سے شریک ہوتے تھے ۔

اس مرتبہ وہ چیف سکریٹری کے طور پر شامل ہوئے اسکا اثر بھی دیکھنے کو ملا کہ گیا ہوائی اڈے پر بڑے منظم طریقے سے جائزہ اجلاس ہوا ، ڈسٹرکٹ انتظامیہ کے سبھی بڑے عہددار جس میں ڈی ایم ، ایس پی ، نگر آیوکت ، ایس ڈی او سول سرجن محکمہ پی ایچ ڈی کے ایگزیکٹیو انجنیئر سمیت سبھی محکموں کے افسران شامل تھے۔

واضح ہو کہ بہار سے اس برس 52سو سے زیادہ عازمین حج مقدس سفر حج پرروانہ ہونگے اس میں سترہ سو عازمین کولکاتا امبارکیشن سے روانہ ہورہے ہیں جبکہ 3465عازمین گیا ہوائی اڈہ سے سات جون سے 22جون تک روانہ ہونگے