بہار: شراب کے خلاف مہم میں وزیراعلیٰ کے سخت تیور

بہار کے وزیراعلیٰ نتیش کمار کی صدارت میں شراب بندی، ایکسائز اور رجسٹری محکمہ کی جائزہ میٹنگ ہوئی جس میں نتیش کمار نے سخت الفاظ میں شراب بندی پر زور دیا۔

میٹنگ میں ڈی جی پی، ایس کے سنگھل نے موجودہ صورتحال کی جانکاری دیتے ہوئے بتایا کہ تمام اضلاع سے شراب کی ریکوری کی جارہی ہے۔ شہری علاقوں کے ساتھ ساتھ دیہی علاقوں میں بھی اس سلسلہ میں خصوصی مہم چلائی جارہی ہے،

انہوں نے کہا کہ 'بڑے بڑے شراب کے گودام پرچھاپہ ماری کی کارروائی جاری ہے اور اس کاروبار منسلک لوگوں کے ساتھ ساتھ ریاست کے باہر کے بھی شراب کے بڑے کاروباریوں، جو یہاں شراب کی سپلائی کرتے ہیں انہیں بھی گرفتار کر نے کی کارروائی کی جارہی ہے۔

میٹنگ کے دوران وزیراعلیٰ نتیش کمار نے ہدایت دی کہ شراب پینے والوں کے ساتھ ساتھ شراب کے کاروباریوں پر بھی پوری طرح سے پابندی لگائی جائے اور جو شراب مافیا کارروائی کے بعد جیل جاتے ہیں ان کے جیل سے باہر آنے کے بعد ان کی ہر سرگرمی پر نظر رکھیں۔ انہوں نے کہا کہ شراب پینا بری چیز ہے اسے لوگوں کے درمیان تشہیر کریں۔

وزیراعلیٰ نے کہا کہ عالمی ادارہ صحت کے ذریعہ سال 2018 میں رپورٹ شائع ہوئی تھی جس میں پوری دنیا میں شراب پینے سے ہونے والے نقصانات کے بارے میں تفصیلی جانکاری دی گئی تھی۔

رپورٹ میں بتایا گیا تھا کہ شراب نوشی کے سبب حادثات، خود کشی اور کئی دیگر طرح کے امراض لاحق ہوتے ہیں۔ لوگوں کو شراب کے استعمال سے ہونے والے نقصانات کے بارے میں سوشل میڈیا اور دیگر تشہری ذرائع سے لوگوں کو ہوشیار اور بیدار کر یں۔

سوشل میڈیا کے توسط سے شراب مافیاﺅں کی گرفتاری اور ان پر کی جارہی کارروائی کے بارے میں بھی لوگوں کو جانکاری دیں۔

انہوں نے کہا کہ نیچے سے لے کر اوپر تک کے تمام حکام کو ہوشیاررہ کر کام کرنے کی ضرورت ہے۔ لگن کے ساتھ مسلسل مہم چلاتے رہیں تاکہ کوئی بچ نہیں سکے۔ ہیڈ کوارٹر سطح سے مسلسل اس کا جائزہ لیتے رہیں۔ یومیہ زمینی سطح پر کی جارہی کارروائی کی رپورٹ لیں۔ دیشی شراب کے کاروباریوں کے خلاف بھی چھاپہ ماری کر کے کارروائی کریں۔

اس میٹنگ میں ڈی جی پی، ایس کے سنگھل، ایڈیشنل چیف سکریٹری داخلہ، شراب بندی، ایکسائز و رجسٹری چیتنئے پرساد، وزیراعلیٰ کے پرنسپل سکریٹری دیپک کمار، چنچل کمار، وزیراعلیٰ کے سیکریٹری منیش کمار ورما، انوپم کمار سمیت دیگر سینئر افسران موجود تھے۔