بھاگلپور: کانگریس کے رہنماؤں میں رسہ کشی جاری

بہار میں اسمبلی انتخابات کی تاریخوں کا باضابطہ اعلان تو نہیں ہوا ہے لیکن سیاسی پارٹیوں نے اپنی تیاریاں شروع کر دی ہیں۔

اس سلسلے میں کانگریس نے بھاگلپور ضلع کے آبزرور رام دیو رائے کو ضلع میں پارٹی کارکنان سے مشورہ کے لئے بھیجا تھا اور پارٹی کے دفتر میں دن میں گیارہ بجے سے ڈھائی بجے تک پارٹی کارکنوں کے ساتھ ملاقات کا وقت طے کیا گیا تھا تاکہ پارٹی کارکنوں کی رائے جان کر بھاگلپور کے تین اسمبلی حلقوں پر امیدواروں کی فہرست بنا سکیں لیکن پارٹی کے کارکنان کانگریس دفتر میں اپنے رہنما رام دیو رائے کا انتظار ہی کرتے رہے اور معلوم ہوا کہ وہ آکر پارٹی کارکنوں سے ملے بغیر ہی واپس پٹنہ لوٹ گئے جس سے کانگریس کارکن بے حد مایوس نظر آئے۔

بھاگلپور کے تین اسمبلی حلقوں پر کانگریس اپنا امیدوار اتارنا چاہتی ہے جس میں سے شہری حلقہ سے کانگریس کے سینئر رہنما سید شاہ علی سجاد اپنی امیدواری کا دعویٰ کر رہے ہیں۔

ان کا کہنا ہے کہ مسلمان کب تک صرف ووٹ ڈالتے رہیں گے لیکن ضلع کانگریس میں چل رہی رسہ کشی کے بارے میں بھی سید شاہ علی سجاد نے کانگریس لیڈر کی تنقید کی اور کہا کہ کچھ لوگ اپنی من مانی کر رہے ہیں جو پارٹی کی صحت کیلئے ٹھیک نہیں ہے۔

کچھ دنوں قبل ہی سید شاہ علی سجاد کو کانگریس ضلع کی صدارت سے برطرف کرتے ہوئے ان کی جگہ پرویز جمال کو ضلع کانگریس کا صدر بنایا گیا ہے۔

ادھر شہری حلقہ سے موجودہ ایم ایل اے اجیت شرما سے لوگ بیحد ناراض ہیں کیونکہ لوگوں خاص طور پر مسلمانوں کو شکایت ہے کہ اجیت شرما نے مسلمانوں کے مسائل کو نظرانداز کیا اور کوئی بھی ترقیاتی کام نہیں کیا ہے اور اگر ان کو پارٹی نے دوبارہ ٹکٹ دیا تو یہاں سے کانگریس کی شکست طے ہے۔