اورنگ آباد: آسمانی بجلی سے تحفظ کےلیے بیداری مہم

بہار کے اورنگ آباد ضلع میں آسمانی بجلی سے ہر سال ہونے والے جان و مال کے نقصان سے تحفظ کیلئے آفات مینجمنٹ محکمہ اور ضلع انتظامیہ کی جانب سے وسیع بیداری مہم کی شروعات کی گئی ہے۔

اورنگ آباد میں آج ضلع مجسٹریٹ سوربھ جوروال نے دیہی علاقے میں عوام الناس کو آسمانی بجلی سے تحفظ سے متعلق بیدار کرنے کے مقصد سے کلکٹریٹ احاطہ سے” وجر پات سورکشا رتھ “ کو ہری جھنڈی دکھا کر روانہ کیا۔ اس موقع پر پولیس سپرنٹنڈنٹ سدھیر کمارپوریکا ، ضلع آفات مینجمنٹ افسر فتح فیاض بھی موجود تھے۔

جوروال نے بیداری رتھ روانہ کرنے کے بعد بتایاکہ ضلع میں گذشتہ سال آسمانی بجلی سے 29 لوگوں کی موت ہوگئی تھی۔ اس سال ابھی تک اس کی زد میں آکر قریب ایک درجن سے زائد لوگوں کی موتیں ہوئی ہیں۔ ویسے میں یہ بیداری رتھ ضلع کے سبھی بلاکوں اور پنچایتوں میں گھوم ۔ گھوم کر شہریوں کو اس سے کیسے بچیں اس کیلئے بیدار کرے گا۔

ضلع مجسٹریٹ نے ضلع کے باشندوں سے اپیل کی ہے کہ اگر بارش کی صورتحال ہو یا بارش ہورہی ہو تو باہر نہ نکلیں۔ اگر باہر میں یا کھیت میں ہوں تو کسی درخت کے نیچے یا تالاب کے نیچے نہ بیٹھیں۔بلکہ کسی مضبوط محفوظ مقام پر پہنچیں اور اپنی جان کی حفاظت کریں۔

یو این آئی