انجمن ترقی اردو بہار کے زیر اہتمام اردو بیداری کانفرنس منعقد ہوئی

Awareness Conference In Gaya گیا میں انجمن ترقی اردو کے زیراہتمام یک روزہ اردو بیداری کانفرنس منعقد ہوئی ، اس میں معروف ادبا شعراء اور خانقاہوں سے جڑی معزز شخصیات نے شرکت کی اور اپنے تاثرات کا اظہار کیا اور یہ بھی طے پایا کہ ضلع کے ہر بلاک میں اردو بیداری پروگرام منعقد کیے جائیں گے۔

گیا:انجمن ترقی اردو گیا ضلع اکائی کی جانب سے اردو بیداری کانفرنس کا اہتمام الحمد اسلامک اسکول نگمتیہ روڈ میں کیا گیا۔ جس کی صدارت انجمن ترقی اردو بہار کے سکریٹری عبدالقیوم انصاری نے کی جبکہ مہمان خصوصی کے طور پر سید شاہ ارباب اشرف سجادہ نشیں بیتھو شریف اور مشہور فکشن رائٹر احمد صغیر موجود تھے۔ اس کانفرنس کی نظامت فیضان مصطفی نے کی ۔پروگرام کا باضابطہ آغاز کلام پاک کی قرات سے کیا گیا۔

اس کے بعد الحمد اسلامک اسکول کے ڈائریکٹر میم نازش نے شال اور گلدستہ سے مہمانوں کا استقبال کیا۔انجمن ترقی اردو گیا کے صدر ڈاکٹر عبدالسلام نے انجمن ترقی اردو کا تعارف کرایا اور بیداری کانفرنس کی ضرورت پر زور دیا۔ڈاکٹر احمد صغیر نے اپنی تقریر میں کہا کہ اردو کے فروغ کے لیے اپنے بچوں کو اردو کی تعلیم دلوائیں اور بچوں کو اردو کی تعلیم کی طرف راغب کریں تبھی اردو کا بھلا ہوگا ، اس کے بعد عائشہ جبیں اور نازیہ شہاب اصلاحی اکیڈمی کی طالبات نے اردو زبان پر اظہار خیال کیا۔

آر جے ڈی رہنماء محمد شکیل نے ایک نظم سنائی ، جبکہ ایڈوکیٹ مسعود منظر نے کہا کہ ہمیں جھوپڑیوں میں رہنے والے بچوں کے بیچ جا کر اردو پڑھانا ہوگا اور کوشش کرنی ہوگی اُردو ہر جگہ عام ہو ، ساتھ ہی ان بچوں کو بھی اُردو پڑھنے پر زور دینے کی ضرورت ہے جو بڑے اسکولوں میں زیر تعلیم ہیں ، طارق سلام نے اردو کے فروغ میں مدارس کے کردار پر اپنا مضمون پیش کیا۔

مشہور شاعر اعجاز مان پوری نے ایک نظم سنائی جس میں اُردو کے فروغ کا پیغام شامل تھا ، زاہد خان نے اپنے تاثرات میں کہا کہ اردو مہذب زبان ہے ، بزرگ شاعر ندیم جعفری نے اپنے تاثرات میں اردو اخبار ، پورٹل وغیرہ پڑھنے پر زور دیا اور کہا کہ اُردو پڑھیں گے تبھی عام بول چال کی زندگی میں استعمال کرسکیں گے اس کے بعد کانفرنس میں موجود سبکدوش ڈی ایس پی مرغوب اثر فاطمی نے اپنے تاثرات میں کہا کہ اردو کو بچانے کے لیے اردو رسالے وغیرہ خرید کر پڑھنے ہوں گے ۔

اس موقع پر مہمان خصوصی کی حیثیت سے شرکت کرنے والے سجادہ نشین حضرت سید شاہ ارباب اشرف کو بھی توصیفی سند سے نوازا گیا ، سید ارباب اشرف نے کہا کہ اردو پڑھنے والوں کی تعداد کم ہو رہی ہے انہوں نے اردو کا ڈیٹا بھی پیش کیا۔

انجمن ترقی اردو بہار کے سیکرٹری عبدالقیوم انصاری نے کہا کہ اردو بیداری کانفرنس کا مقصد ہے کہ اردو کے لیے عوام کو بیدار کرنا ، بار بار اچھی باتوں کا ذکر کرنا تاکہ لوگ اس کی طرف متوجہ ہوں۔ انجمن کا کام لوگوں کو جگانا ہے تاکہ اردو کا فروغ ہو سکے ،وہیں پروگرام کے آخر میں طلبا و طالبات کو سرٹیفکیٹ اور میڈل سے نوازا گیا اور فیضان عزیزی کے شکریہ کے ساتھ پروگرام کا اختتام ہوا.