گیا:بہار کے ضلع گیا میں بھارت جوڑو یاترا کی پہلی سالگرہ کے موقع پر بودھ گیا کے مہابودی کنونشن ہال میں بھارت جوڑ جن سنواد اور ایک عظیم الشان استقبالیہ تقریب کا انعقاد ہوا ۔بھارت جوڈو جن سنواد کا انعقاد کانگریس اقلیتی سیل کے قومی سکریٹری اور بھارت جوڑو یاتری عمیر احمد خان کی قیادت میں ہوا۔
اس موقع پر مقرر خصوصی اور کانگریس اقلیتی سیل کے قومی صدر عمران پرتاپ گڑھی نے خطاب کرتے ہوئے کہا کہ بودھ گیا کے اس تاریخی پروگرام کو دیکھ کر لگتا ہے کہ ملک میں انڈیا اتحاد کی عوام کے درمیان مقبولیت کس طرح بڑھ رہی ہے۔ ہزاروں کا مجمع ہوائی اڈہ سے انکے ساتھ آیا ہے۔ہر طرف اس اتحاد کی پزیرائی ہے۔
انہوں نے کہا کہ آپ نے دیکھا ہوگا کہ ملک کی مختلف ریاستوں میں کل سات سیٹوں پر ضمنی انتخابات ہوئے، جس میں سے چار سیٹوں پر انڈیا اتحاد کے امیدواروں نے جیت درج کی ہے، انہوں نے کہا کہ ملک کے عوام کو راہل گاندھی پر بڑا بھروسہ ہے اور جہاں بھی بھارت جوڑو کی بات ہو رہی ہے، راہل گاندھی کو بھارت جوڑنے کے لیے شکریہ ادا کیا جا رہا ہے، جس سے ظاہر ہوتا ہے کہ راہل گاندھی کا سفر بہت کامیاب ہوا ہے، ملک کی سیاست کو ایک الگ سمت دے دی ہے۔
مرکزی حکومت پر تنقید کرتے ہوئے کہا کہ 9 سال بی جے پی حکومت نے ٹرین والی حکومت کو بیل گاڑی والی حکومت بنا دیا ہے۔مہنگائی آسمان پر ہے، گیس سلنڈر سے لے کر اشیائے خوردونوش کے ساتھ پٹرول اور ڈیزل اتنا مہنگا ہو گیا ہے کہ یہ تمام چیزیں عام لوگوں کی پہنچ سے باہر ہوتی جا رہی ہیں، عوام مہنگائی سے بہت غمگین اور ناراض ہے بہار کی سرزمین ایسی تاریخی سرزمین ہے جہاں ہمیشہ سیاست کو ایک الگ رُخ دیا ہے اور بہار نے ملک میں اقتدار کی تبدیلی کی ایک الگ مثال پیش کی ہے۔ بہار سے شروع ہونے والی تبدیلی پورے ملک میں تبدیلی اور انقلاب لائے گی، اڈانی امبانی اور آر ایس ایس کی یہ حکومت ختم ہو جائے گی اور آنے والے دنوں 2024 میں ملک میں انڈیا اتحاد کی حکومت بنے گی جبکہ کانگریس اقلیتی سیل کے قومی سکریٹری عمیر احمد خان نے ملک میں کمر توڑ مہنگائی بے روزگاری اور بڑھتی نفرت کے لیے بی جے پی کو ذمہ دار ٹھہراتے ہوئے مرکز حکومت سخت تنقید کا نشانہ بنایا ۔
عمیر احمد خان نے کہاکہ لوٹ کھسوٹ بی جے پی کے ڈی این اے میں شامل ہے ، بی جے پی کو عوام سے نہیں صرف اپنے دوستوں سے مطلب ہے۔ اپنی حکومت بچانے کے لیے وہ ملک میں نفرت کا ماحول قائم کرنے میں لگی ہے لیکن بی جے پی کی نفرت کو کانگریس اور اس کے رہنما کامیاب نہیں ہونے دیں گے۔