آٹھ سالہ بچی کا جنسی زیادتی کے بعد قتل

روہتاس میں دیوالی کے دن ایک آٹھ سالہ بچی کے ساتھ جنسی زیاتی کرنے کے بعد ملزم نے بچی کا قتل کر کے لاش کو باکس میں چھپا دیا۔ اس واقعہ سے ناراض لوگوں نے ملزم کو پکڑنے کے بعد اس کی جم کر پٹائی کی۔

ریاست بہار کے روہتاس میں ایک آٹھ سالہ بچی کے ساتھ جنسی زیادتی کر کے بچی کا قتل کر دیا گیا۔ بتایا جا رہا ہے کہ آٹھ سالہ بچی دیوالی کی پوجا کے لیے گھر سے نکلی تھی، اسی درمیان گاؤں کے ہی رہائشی بلرام سنگھ نامی شخص کی نظر اس بچی پر پڑی اور اسے وہ اپنے جھانسے میں لے کر اپنے خالی پڑے ایک مکان میں لے گیا، جہاں اس نے بچی کے ساتھ جنسی زیادتی کی۔

گاؤں والوں کے مطابق گھر سے نکلی بچی کو جب گھر والوں نے تلاشنے کی کوشش کی تو پتہ چلا کہ بچی کو ملزم کے ساتھ دیکھا گیا۔ جب مقامی لوگ گھر کے اندر داخل ہوئے تو بند پڑے بکسے سے بچی کی لاش بر آمد ہوئی۔

اس واقعہ سے ناراض لوگوں نے ملزم کی خوب پٹائی کی۔ جس کے بعد موقع پر پہنچی پولیس نے بیچ بچاؤ کرکے ملزم کو علاج کے لیے ہسپتال روانہ کیا۔

واقعے کے بعد مشتعل افراد نے ملزم کو موقع پر پھانسی دینے کا مطالبہ کیا۔ فی الحال پولیس نے بچی کی لاش کو قبضہ میں لے کر پوسٹ مارٹم کے لئے روانہ کر دیا ہے۔

اس سلسلے میں ایس پی سنجے کمار نے بتایا کہ ملزم کو گرفتار کرلیا گیا ہے اور معاملے کی تفتیش کی جارہی ہے۔

وہیں اس پورے واقعے نے دیوالی کے دن سب کو غمگین کر دیا۔ ایک طرف لوگ دیوی لکشمی کی پوجا میں مصروف تھے۔ تو دوسری طرف ایک ملزم اس گھناؤنے جرم کو انجام دے رہا تھا۔

فی الحال پولیس نے ملزم کو گرفتار کرلیا ہے۔