سوپور: واٹر فلٹریشن پلانٹ کی تعمیر جلد مکمل کرنے کا مطالبہ

شمالی کشمیر کے قصبہ سوپور میں سیر جاگیر سے تعلق رکھنے والے لوگوں نے محکمہ جل شکتی کے خلاف احتجاج کرتے ہوئے 7 سال سے بند پڑے واٹر فلٹریشن پلانٹ کے کام کو جلد مکمل کرنے کی مانگ کی۔

ضلع بارہمولہ میں تحصیل ہیڈ کوارٹر سوپور سے 5 کلو میٹر دوری پر واقع سیر جاگیر کے لوگوں نے محکمہ جل شکتی دفتر کے سامنے احتجاجی مظاہرہ کیا۔

مظاہرین کے مطابق 'کئی سال قبل ان کے علاقے کو پینے کا صاف پانی مہیا کرانے کی غرض سے ایک واٹر فلٹریشن پلانٹ کو منظوری دی کر کام شروع کیا گیا تاہم کام کو بلا وجہ روک دیا گیا۔'

لوگوں کے مطابق انہیں بغیر فلٹر کیا ہوا پانی ہی استعمال میں لانا پڑتا ہے جس کے سبب آئے دن لوگ بیمار ہو جاتے ہیں۔

انہوں نے ضلع انتظامیہ سمیت لیفٹیننٹ گورنر انتظامیہ سے مداخلت کی اپیل کرتے ہوئے واٹر فلٹریشن پلانٹ کو جلد مکمل کرنے کا مطالبہ کیا۔