Fire Incident in Sopore سوپور میں آگ کی واردات میں لکڑی فیکٹری خاکستر

سوپو کے بابا یوسف علاقہ میں آتشزدگی کی ایک ہولناک واردات میں ایک لکڑی کی فیکٹری خاکستر ہوگئی۔ پولیس آگ لگنے کی وجوہات کے بارے میں تحقیقات کر رہی ہے۔ وہیں متاثریں نے انتظامیہ سے امداد کی اپیل کی ہے۔

بارہمولہ: شمالی کشمیر کے ضلع بارہمولہ کے سوپور بابا یوسف علاقہ میں آتشزدگی کی ایک ہولناک واردات میں ایک لکڑی کی فیکٹری خاکستر ہوگئی۔ اس آتشزدگی کے واردات کے دوران کوئی جانی نقصان نہیں ہوا،تاہم آگ کے سبب لاکھوں روپئے مالیت کا نقصان ہوا ہے۔
بتایا جا رہا ہے اتوار کی شب لکڑی کی فیکٹری سے اچانک آگ کے شعلے بلند ہوئے۔ مقامی باشندوں کے مطابق آگ کی لپٹیں فوراً ہی ایک اور قریبی گھر تک پھیل گئیں، لیکن اس پر قابو پایا گیا۔آگ لگنے کے بعد مقامی لوگوں نے فوراً پولیس اور محکمہ فائر اینڈ ایمرجنسی کو مطلع کیا۔ فائر ٹینڈرز نے فوری طور آگ بجھانے کا عمل شروع کیا،تاہم آگ نے پوری فیکٹری کو خاکستر کیا ہے۔ پولیس نے واقعے کا نوٹس لیتے ہوئے معاملہ درج کرکے آگ لگنے کی وجہ معلوم کرنے کی غرض سے تحقیقات کا آغاز شروع کیاہے۔

ادھر مقامی باشندوں نے انتظامیہ سے آگ کے سبب ہوئے نقصان کا جائزہ لینے اور متاثرین کی فوری امداد اور باز آبادکاری کی اپیل کی ہے۔فیکٹری کے مالک نے بتایا کہ ہم اس لکڑی کی فیکٹری میں سیب کے ڈبے بناتے تھے اور یہاں دس سے زائد لوگ اپنی روزی روٹی حاصل کرتے تھے، لیکن آگ لگنے کے بعد فیکٹری کو کافی نقصان ہوا ہے۔

واضح رہے کہ رواں برس وادی کشمیر کے طول و ارض میں درجنوں رہائشی مکانات، کمشرل عمارتوں سمیت گؤ خانے آگ کی واردات میں خاکستر ہوگئے۔ آتشزدگی کی ان واردات میں کروڑوں روپئے مالیت کا نقصان ہوا ہے جبکہ متعدد افراد ہلاک اور کئی زخمی بھی ہوئے ہیں۔