سوپور میں محکمہ سوشل ویلفیئر کے خلاف احتجاج

آدھار کارڈ اجرا نہ کیے جانے پر شمالی کشمیر کے قصبہ سوپور میں ضلع انتظامیہ اور محکمہ سوشل ویلفیئر کے خلاف عوام نے احتجاج کیا۔

ضلع بارہمولہ کے سوپور قصبہ میں جمعرات کو محکمہ سوشل ویلفیئر اور ضلع انتظامیہ کے خلاف نعرے بازی کرتے ہوئے مقامی باشندوں نے احتجاج کیا۔

احتجاج کر رہے لوگوں کا کہنا تھا کہ انہیں ابھی تک آدھار کارڈ فراہم نہیں کیا گیا۔

احتجاجیوں کا کہنا تھا کہ موجودہ دور میں بینک، اسکول اور سبھی سرکاری محکموں میں آدھار کارڈ کی ضرورت پڑتی ہے تاہم سرکار کی جانب سے انہیں ابھی تک آدھار کارڈ فراہم نہیں کیا گیا ہے۔

انہوں نے محکمہ سوشل ویلفیئر کے افسران پر سستی کا الزام عائد کرتے ہوئے کہا کہ وہ عوام کو راحت پہنچانے کی خاطر سنجیدہ نہیں۔ احتجاجیوں نے کہا: ’’ہم نے آدھار کارڈ حاصل کرنے کی غرض سے کئی بار محکمہ کے چکر کاٹے، دور دراز علاقہ جات سے آنے کے باوجود ہماری کوئی نہیں سنتا، افسران ہر بار ایک یا دو دن کہہ کر ٹال دیتے ہیں۔‘‘

انہوں نے مزید کہا کہ ’’اب راشن بھی آدھار کارڈ سے منسلک کر دیا گیا ہے، جس کے پاس راشن کارڈ نہیں ہوگا انہیں اگلے ماہ سے راشن نہیں دیا جائے گا۔‘‘

اس سلسلے میں عوام نے جمعرات کو سوپور میں احتجاج کرتے ہوئے محکمہ سوشل ویلفیئر کے خلاف نعرے بازی کی۔

احتجاج کے سبب ٹریفک کی نقل و حرکت بھی متاثر رہی۔

احتجاج کر رہے مظاہرین نے ضلع انتظامیہ اور محکمہ سوشل ویلفیئر سے عوامی مشکلات کو مد نظر رکھتے ہوئے انہیں جلد سے جلد آدھار کارڈ فراہم کرنے کی اپیل کی۔