بارہمولہ: راستے میں پانی بھرنے سے مقامی لوگ پریشان

مقامی آبادی نے محکمہ آر اینڈ بی اور ضلع انتظامیہ کو ڈرینیج نظام کو بہتر کرنے کے حوالے سے کئی بار آگاہی دی لیکن متعلقہ محکمہ کو اس بات کی کوئی پرواہ نہیں۔

ضلع بارہمولہ کی گلشن آباد کالونی میں ناقص ڈرینیج نظام کے باعث سڑکوں پر پانی جمع ہونے سے لوگوں کو عبور و مرور میں دقتوں کا سامنا کرنا پڑ رہا ہے۔

مقامی لوگوں کا کہنا ہے کہ علاقے کا ڈرینیج نظام ناکارہ ہونے کے سبب سڑکیں زیر آب رہتی ہیں۔ لوگوں کا کہنا ہے کہ معمولی بارشوں کے دوران علاقے کی رابطہ سڑکیں جھیل کا منظر پیش کرتی ہیں۔

مقامی لوگوں نے بتایا کہ ناقص ڈرینیج نظام کے باعث سڑکیں ہمیشہ زیر آب رہتی ہیں، جس سے لوگوں، خصوصاً طلبا کو عبور و مرور میں کافی دقتیں پیش آتی ہیں۔

انہوں نے کہا کہ اس ضمن میں مقامی آبادی نے محکمہ آر اینڈ بی اور ضلع انتظامیہ کو ڈرینیج نظام کو بہتر کرنے کے حوالے سے کئی بار آگاہی دی لیکن متعلقہ محکمہ کو اس بات کی کوئی پرواہ نہیں ہے۔

لوگوں نے ضلع ترقیاتی کمشنر سے مطالبہ کیا ہے کہ ڈرینیج کے نظام کو جلدی سے ٹھیک کیا جائے تاکہ لوگوں کو مزید مشکلات سے دو چار نہ ہونا پڑے۔