خط افلاس سے نیچے گزر بسر کر رہے لوگوں کو کووڈ 19 سے لڑنے میں مدد کے لئے بارہمولہ میں جموں و کشمیر پولیس نے ضلع کے اوڑی علاقے میں پسماندہ خاندانوں میں حفاظتی کٹ تقسیم کیے۔
تقریب میں موجود بی پی ایل کنبوں میں فیس شیلڈ، ٹرپل لیئر این 95 ماسک، آکسیمٹر، ڈیجیٹل تھرمامیٹر، سینیٹائزر بوتلیں، دستانے اور صابن پر مشتمل کووڈ 19 سیفٹی کٹس تقسیم کیے گئے۔
ضلع بارہمولہ کے سینیئر سپرنٹنڈنٹ پولیس عبد القیوم (ایس ایس پی) کے مطابق تقریبا 465 افراد نے مراعات حاصل کیں۔
انہوں نے کہا کہ 'ہم نے ضلع میں خط افلاس سے نیچے 465 افراد کی نشاندہی کی اور ان میں سیفٹی کٹس تقسیم کیا۔ ہم نے ان تمام سہولیات کو شامل کیا ہے جن کی انہیں ضرورت ہوسکتی ہے جن میں آکسیمٹر اور این 95 ماسک شامل ہے۔'
سینیئر پولیس عہدیداروں نے لوگوں کو کورونا وائرس سے آگاہ کیا اور کٹس میں موجود اشیاء کی افادیت سے واقف کیا۔
مقامی لوگوں نے کہا کہ 'ہم پولیس کے انتہائی شکرگزار ہیں کہ انہوں نے ہماری مدد کی اور ہمیں اپنے اور اپنے کنبے کو کووڈ 19 سے بچانے کے قابل بنایا۔ سردی کی وجہ سے انفیکشن کا زیادہ خطرہ ہے اور ہمیں امید ہے کہ اس طرح کے اقدامات جاری رہیں گے۔'
