شمالی کشمیر میں جمعرات کے روز قہر انگیز ژالہ بھاری سے سیب کے باغات اور دھان کی پنیری کو نقصان پہنچا ہے ۔ رفیع آباد کے دور افتادہ علاقے میں بادل پھٹنے سے ندی نالوں میں طغیانی آئی جس وجہ سے چار رہائشی مکانوں کو نقصان پہنچا جبکہ ہندواڑہ میں آسمانی بجلی گرنے کے نتیجے میں جنگل سے آگ نمودار ہوئی ۔Gusty winds, cloudburst in North Kashmir
اس دوران پونچھ کے تحصیل منڈی میں آسمانی بجلی گرنے کے باعث دو منزلہ مکان خاکسترہوا۔ اطلاعات کے مطابق جمعرات کی سہ پہر کو شمال وجنوب میں تیز آندھی کے ساتھ ساتھ قہر انگیز ژالہ بھاری ہوئی جس وجہ سے متعدد سیب کے باغات اور ساگزاروں کو نقصان پہنچا ہے۔انہوں نے بتایا کہ شمالی کشمیر کے ہرل ، ماور، سنزی پورہ ، قلم آباد ، ہر ویٹھ ، عاشپورہ ، بڈ بوگ، دری بل بالا، دری بل پائین، شیخ پورہ ، ترینا ، آڈورہ اورا س کے ملحقہ علاقوں میں قہر انگیز ژالہ بھاری کے نتیجے میں سیب کے باغات کو شدید نقصان پہنچا جبکہ دھان کی پنیری بھی تباہ وبرباد ہو کررہ گئی۔ Hailstorm in Kashmir
بارہ مولہ کے نور کھاہ بونیار اور گلمرگ میں بھی سہ پہر کے بعد زور دار ژالہ بھاری کے نتیجے میں کئی باغات تباہ وبرباد ہو کررہ گئے۔ بانڈی پورہ کے چھٹے بانڈے اور گرورا علاقوں میں بھی شدید ژالہ بھاری ہوئی۔cloudburst damage orchards
دریں اثنا رفیع آباد بارہ مولہ کے باخی پورہ میں بادل پھٹنے کے نتیجے میں ندی نالوں میں طغیانی آئی اور دیکھتے ہی دیکھتے سیلابی پانی رہائشی مکانوں میں گھس آیا جس وجہ سے نصف درجن کے قریب مکانات کو نقصان ہوا ہے۔
معلوم ہوا ہے کہ ہندواڑہ کے لچھی پورہ جنگل کے کمپارٹمنٹ نمبر 46 میں آسمانی بجلی گرنے کے نتیجے میں جنگل سے آگ نمودار ہوئی جس وجہ سے دیودار کے درختوں کو نقصان پہنچا ہے۔