Baramulla Cricket Tournament: بپن راوت کرکٹ ٹورنامنٹ کا اختتام

ضلع بارہمولہ میں منعقدہ جنرل بپن راوت کرکٹ ٹورنامنٹ کے فائنل میچ میں سلطان واریئرز نے بہتر کھیل کا مظاہرہ کرتےہوئے ٹرافی اپنے نام کی۔

بارہمولہ:کھیل کود کی سرگرمیوں میں زیادہ سے زیادہ نوجوانوں شرکت کو یقینی بنائے جانے کی غرض سے فوج، پولیس اور متعلقہ محکمہ جات کی جانب سے کھیل مقابلوں کا انعقاد عمل میں لایا جاتا ہے۔ اسی سلسلے کی ایک کڑی کے تحت جہلم اسٹیڈیم بارہمولہ میں جنرل بپن راوت میموریل کرکٹ ٹورنامنٹ کا انعقاد عمل میں لایا گیا۔ کرکٹ ٹورنامنٹ کے فائنل میچ سے لطف اندوز ہونے اور کھلاڑیوں کی حوصلہ افزائی کے لیے جی او سی 15کور کمانڈر، ڈی سی بارہمولہ سید سحرش اصغر کے علاوہ دیگر پولیس، فوجی اور سیول انتظامیہ کے افسران شریک رہے۔

کرکٹ ٹورنامنٹ میں وادی کشمیر کے مختلف اضلاع سے آئی 48 ٹیموں نے شمولیت اختیار کی۔ فائنل میچ سلطان واریئرز اور بی سی سی ریڈ کے درمیان کھیلا گیا جس میں سلطان واریئرز نے خامیابی حاصل کرکے ٹرافی اپنے نام کی۔ فائنل میچ کے دورران سینکڑوں کرکٹ شائقین میدان میں موجود رہے اور کھلاڑیوں کی حوصلہ افزائی کی۔ ٹورنامنٹ کے اختتام پر ایک تقریب منعقد کی گئی جس میں کامیابی ٹیم کو ٹرافی جبکہ فائنل میچ سمیت ٹورنامنٹ میں بہتر کارکردگی کا مظاہرہ کرنے والے کھلاڑیوں کو اعزاز سے نوازا گیا۔

میڈیا نمائندوں کے ساتھ گفتگو کرتے ہوئے 15کور کمانڈر نے کہا: ’’بارہمولہ سمیت جموں و کشمیر بھر میں کھیل مقابلے خاص کر کرکٹ ٹورنامنٹ منعقد کیے جا رہے ہیں اور ان ٹورنامنٹس میں کھلاڑیوں کی بڑھ چڑھ کر شرکت ایک خوش آئند بات ہے۔‘‘ انہوں نے کہا کہ مستقبل میں بھی اس طرح کے کھیل مقابلے جاری رکھے جائیں گے۔ ادھر، مقامی باشندوں، کھلاڑیوں نے فوج کی ستائش کرتے ہوئے کہا کہ اس طرح کے کھیل مقابلوں سے کھلاڑیوں کو ایک بہتر پلیٹ فارم مہیا ہوتا ہے۔