Lockdown Effects: چھوٹے کاروباری لاک ڈاؤن کے اثرات سے دو چار

لاک ڈاؤن اور کورونا کے قہر (Lockdown Effects) سے جہاں زندگی کا ہر ایک شعبہ متاثر ہوا وہیں، سب سے زیادہ مار چھوٹے کاروباریوں، خوانچہ فروشوں اور خود روزگار کمانے والوں کو جھیلنا پڑا۔

خود روزگار کمانے والے چھوٹے کاروباریوں نے اپنی زندگی کی پونجی لگا دی۔ وہیں، کورونا کے دور میں مربوط منصونہ بندی اور متعلقہ حکام کی طرف سے بیک اپ پلان کے فقدان نے صورتحال کو تشویس ناک بنا دیا ہے۔

شمالی کشمیر کے ضلع بارہمولہ کے اچھبل رفیع آباد کے اعجاز احمد ایک کاروباری ہیں۔ انہوں نے اپنی کمائی ہوئی ساری پونجی پھولوں کے کاروبار میں لگا دی تھی۔ ابتدائی مراحل میں انہیں اچھے نتائج مل رہے تھے۔ تاہم کورونا وبا کی دستک سے سارا ڈھانچہ منہدم ہونے کی دہلیز پر جا پہنچا۔

یہ بات حقیقت ہے کہ آفات پر انسان کا بس نہیں ہوتا۔ تاہم یہ سوال بھی اپنی جگہ ٹھیک ہے کہ حکام کی طرف سے ہنگامی صورت حال میں ایسا اقدام کیوں نہیں کیا جاتا جس سے غریبوں کی روزی روٹی چلتی رہے۔

اعجاز احمد کے مطابق ان کو لاک ڈاؤن کی وجہ سے کافی نقصان اٹھانا پڑا اور ان کا پورا روزگار ختم ہونے کے دہانے پر ہے۔ انہوں نے بتایا کہ اس لاک ڈاؤن کی وجہ سے ان کے کم سے کم ہزار سے اوپر پودے خراب ہو گئے کیونکہ وہ پودے بازار میں نہیں بیج سکے۔

اعجاز احمد نے مزید بتایا کہ ان کے پاس مختلف اضلاع سے لوگ پودے خریدنے آتے تھے لیکن اس وقت کافی مشکلات پیش آ رہی ہیں۔ انہوں نے سرکار سے مطالبہ کیا ہے کہ ان کے نقصان کی بھرپائی کی جائے تاکہ آنے والے وقت میں وہ اپنا روزگار ایک بار پھر شروع کر سکیں۔