Cop Shot Dead In Baramulla بارہمولہ میں مشتبہ عسکریت پسندوں کی فائرنگ میں پولیس اہلکار ہلاک

بارہمولہ ضلع کے وائلو کرالہ پورہ گاوں میں منگل کی شام کو مشتبہ عسکریت پسندوں نے جموں وکشمیر پولیس میں تعینات ہیڈ کانسٹیبل پر نزدیک سے گولیاں چلائیں جس کے نتیجے میں وہ شدید طورپر زخمی ہوا، اور بعد ازاں اس کی ہسپتال میں موت واقع ہوئی۔

بارہمولہ:شمالی کشمیر کے ضلع بارہمولہ کے وائلو کرالہ پورہ گاوں میں منگل کی شام کو مشتبہ عسکریت پسندوں نے جموں وکشمیر پولیس میں تعینات ہیڈ کانسٹیبل پر نزدیک سے گولیاں چلائیں جس کے نتیجے میں وہ شدید طورپر زخمی ہوا، اور بعد ازاں اس کی ہسپتال میں موت واقع ہوئی۔
اطلاعات کے مطابق منگل کی شام بارہمولہ کے وائلو کرالہ پورہ گاوں میں اس وقت خوف و ہراس پھیل گیا جب مشتبہ عسکریت پسندوں نے ہیڈ کانسٹیبل غلام محمد ڈار پر نزدیک سے گولیاں چلائیں جس کے نتیجے میں وہ خون میں لت پت ہوا۔معلوم ہوا ہے کہ گولیوں کی آوازیں سنتے ہی آس پاس رہائش پذیر لوگ گھروں سے باہر آئے اور زخمی اہلکار کو علاج ومعالجہ کی خاطر نزدیکی ہسپتال منتقل کیا،تاہم وہاں پر تعینات ڈاکٹروں نے اسے مردہ قرار دیا۔ذرائع نے بتایا کہ ہیڈ کانسٹیبل کے جسم میں پانچ گولیاں پیوست ہوئیں ہیں جس وجہ سے اس کی برسر موقع ہی موت واقع ہوئی ۔

دریں اثنا پولیس ذرائع نے جانکاری فراہم کرتے ہوئے بتایا کہ عسکریت ہسندوں نے پولیس ہیڈ کانسٹیبل غلام محمد ڈار پر گھر کے باہر فائرنگ کی۔انہوں نے بتایا کہ زخمی پولیس اہلکار کو ہسپتال لے جایا گیا جہاں پروہ جانبر نہ ہو سکا۔ان کا مزید کہنا تھا کہ سکیورٹی فورسز نے آس پاس علاقوں کو محاصرے میں لے کر حملہ آوروں کی بڑے پیمانے پر تلاش شروع کی ہے۔۔

واضح رہے کہ گزشتہ روز پلوامہ میں عسکریت پسندوں نے ایک غیر مقامی مزدور کو گولی مار کر ہلاک کیا تھا۔ اس سے پہلے سرینگر کے عیدگاہ میں اتوار کے روز ایک پولیس افسر کو نامعلوم مسلح افراد نے گولی مار کر زخمی کیا تھا۔ عسکریت پسندں کے حملوں میں غیر معمولی اضافہ کے پیش نظر پوری وادی میں ہائی الرٹ جاری کیا گیا ہے جبکہ غیر مقامی مزدوروں کو شام کے اوقات میں گھروں سے باہر نہ آنے کی تلقین کی گئی ہے۔باوثوق ذرائع نے بتایا کہ یکے بعد دیگرے تین ملیٹینٹ حملوں کے بعد کشمیر کی سکیورٹی صورتحال کا از سر نو جائزہ لیا جارہا ہے۔