سوپور: دستکاروں کو مختلف اسکیمز کی جانکاری دی گئی

ڈاک بنگلو سوپور میں پیر کو محکمہ ہینڈی کرافٹس کی جانب سے دستکاری شعبہ سے وابستہ افراد کے لیے ایک جانکاری پروگرام منعقد کیا گیا۔

ضلع بارہمولہ کے سوپور میں محکمہ ہینڈی کرافٹس نے یک روزہ معلوماتی کیمپ کا انعقاد کیا جس میں بیسیوں دستکاروں نے شرکت کی، جس میں خواتین کی کثیر تعداد شامل تھی۔

کیمپ کے دوران محکمہ کے افسران نے دستکاروں کو محکمہ ہینڈی کرافٹس کی جانب سے وضع کی گئی مختلف اسکیمز سے روشناس کرایا، اس دوران دستکاروں خصوصا خواتین کو آگے آنے کی ہدایت دیتے ہوئے اس طرح کے پروگرامز میں محکمہ کا تعاون کرنے کی اپیل کی گئی۔

کیمپ میں قصبہ سوپور کے علاوہ زنگیر اور رفیع آباد سے تعلق رکھنے والی خواتین دستکاروں نے بھی شرکت کی۔

ای ٹی وی بھارت کے ساتھ بات کرتے ہوئے محکمہ ہینڈی کرافٹس کے افسران نے کہا کہ ’’اس طرح کے پروگرام منعقد کرنے کا مقصد دستکاروں کو مختلف اسکیموں سے روشناس کرانا ہوتا ہے۔‘‘

انہوں نے مزید کہا کہ کیمپ کے دوران دستکاروں کو مختلف اسکیموں کے بارے میں نہ صرف معلومات دی گئی بلکہ مختلف بینکوں کے ذریعے انکی مالی معاونت میں بھی مدد فراہم کی گئی۔