شمالی کشمیر کے ضلع بارہمولہ کے سوپور قصبہ میں محکمہ فلڈ کنٹرول اینڈ اریگیشن کے دفتر میں گزشتہ ایک سال سے ایگزیکیٹیو انجینیئر کے نہ ہونے سے عوام کو کافی مشکلات کا سامنا کرنا پڑ رہا ہے۔
سوپور: محکمہ فلڈ کنٹرول اینڈ اریگیشن میں ایگزیکیٹو انجینئر کے نہ ہونے سے عوام پریشان مقامی لوگوں کے مطابق گزشتہ برس سے ایگزیکیٹیو انجینیئر فلڈ کنٹرول اینڈ اریگیشن کا تبادلہ کیا گیا تب سے لے کر آج تک دوسرے افسر کی تعیناتی عمل میں نہیں لائی گئی، جس سے سوپور کی عوام کو کافی دشواریوں کا سامنا کرنا پڑ رہا ہے۔
ذرائع ابلاغ کے ساتھ بات کرتے ہوئے مقامی لوگوں نے بتایا کہ اس وقت کشمیر میں پنیری کا موسم عروج پر ہے اور ایگزیکیٹیو انجینیئر کے نہ ہونے سے محکمہ فلڈ کنٹرول اینڈ اریگیشن کے ملازمین بقدر ضرورت کھیتوں تک پانی نہیں پہنچا رہے ہیں جس کے سبب کسان بے حد پریشان ہیں۔
مقامی کنٹریکٹرس ایسوسی ایشن کے عہدیداران نے بتایا کہ محکمہ میں افسر نہ ہونے کے باعث ان کی رقومات واگزار نہیں کی جا رہی ہیں، وہیں نئے تعمیراتی کاموں کے لیے بھی ٹینڈر نہیں نکالے جا رہے ہیں۔
انہوں نے اس ضمن میں انتظامیہ سے علاقے میں فوری طور پر ایگزیکیٹیو انجینیئر کی تعیناتی عمل میں لانے کی اپیل کی ہے۔
