Programme on Women Empowerment: اوڑی میں ’وومین امپاورمنٹ اینڈ اوئیرنس‘ پروگرام منعقد

وومین امپاورمنٹ اینڈ اوئیرنس کے عنوان سے منعقدہ پروگرام کے دوران مقررین نے طالبات کو مختلف روزگار بخش اور تعلیم کے حوالہ سے وضع کی گئی سرکاری اسکیموں کے بارے میں آگاہ کیا۔ Women Empowerment Awareness Programme in Uri

بارہمولہ (جموں و کشمیر):خواتین کو بااختیار بنانے اور انہیں حکومت کی جانب سے وضع کی گئ اسکیموں کے بارے میں آگاہی فراہم کرنے کی غرض سے مختلف پروگرامز اور سیمنارز منعقد کیے جاتے ہیں۔ اسی کڑی کے طور پر شمالی کشمیر کے بارہمولہ ضلع میں سرحدی علاقے اوڑی کے نور العلوم سکینڈری اسکول میں فوج کے زیر اہتمام خواتین کے لیے ایک خصوسی آگاہی پروگرام کا انعقاد کیا گیا۔

آگاہی پروگرام ’’ وومین امپاورمنٹ اینڈ اوئیرنس‘‘ کے عنوان سے منعقد کیا گیا تھا اور منتظمین کے مطابق اس کے انعقاد کا اصل مقصد خواتین خاص کر اسکولوں میں زیر تعلیم طالبات کو یوٹی سرکار و مرکزی وحکومت کی جانب سے وضع کی گئی اسکیموں کے بارے میں جانکاری دی جا سکے۔ پروگرام کے دوران مقررین نے طالبات کو نہ صرف مختلف اسکیموں کے بارے میں جانکاری دی بلکہ ان سے استفادہ کرنے کے طریقہ کار بھی سکھائے۔

پروگرام کے دوران خواتین کو روزگار بخش اسکیموں کے ساتھ ساتھ تعلیم کے حوالے سے وضع کی گئی خصوصی اسکیموں کے بارے میں بھی مفصل جانکاری دی گئی۔ علاوہ ازیں سوشل میڈیا کرائمز کے حوالے سے بھی انہیں آگاہ کیا گیا۔ منتظمین کے مطابق پروگرام کے انعقاد کا مقصد مختلف اسکولوں میں زیر تعلیم طالبات کو بااختیار بنانے اور انہیں خاص ہونے کا احساس دلانے کی غرض سے منعقد کیا گیا تھا۔

پروگرام میں فوجی افسران، محکمہ سوشل ویلفیئر کے ملازم، اسکول کے چیئرمین، اساتذہ اور عملہ کے ساتھ ساتھ درجنوں طالبات نے شرکت کی۔ پروگرام کے اختتام پر شرکاء کو اشک شوئی کے انعامات سے بھی نوازا گیا۔