بارہمولہ: برفباری میں آرمی نے حاملہ خاتون کو ہسپتال پہنچایا

بھاری برفباری کے درمیان جہاں عام لوگوں کو مشکلات کا سامنا کرنا پڑا رہا ہے وہیں فوج بھی لوگوں کی مدد کے لئے کام کر رہی ہے۔

جموں وکشمیر میں بھاری برفباری کے سبب ان دنوں معمولات زندگی درہم برہم ہیں۔ بھاری برفباری کے درمیان جہاں عام لوگوں کو مشکلات کا سامنا ہے، وہیں فوج بھی لوگوں کی مدد کے لئے کام کر رہی ہے۔

ضلع بارہمولہ کے سوپور میں واقع رفیع آباد ڈنوار گاؤں کی ایک حاملہ خاتون کا ویڈیو سوشل میڈیا پر کل سے گشت کر رہا ہے، اس ویڈیو میں فوج کے جوان ایک حاملہ خاتون کو سٹریچر پر برف کے درمیان سے ہسپتال لے جا رہے ہیں۔

تقریبا دو گھنٹے تک برف میں پیدل چل کر فریدہ بیگم نامی ایک حاملہ خاتون کو آرمی کے جوانوں نے ہسپتال پہنچایا، جہاں انہوں نے بچے کو جنم دیا۔

بچے کی پیدائش ہسپتال میں ہوئی اور اب زچہ اور بچہ دونوں صحت مند ہیں۔ اس کے بعد آرمی کے ان جوانوں نے خاتون اور ان کے بچے کو ہسپتال سے گھر بھی پہنچا دیا۔

دراصل کشمیر میں ان دنوں بھاری برفباری ہو رہی ہے، جس کی وجہ سے سڑکیں بند ہیں۔ اس کی وجہ سے لوگ اپنے گھروں میں مقید ہوکر رہ گئے ہیں۔