بانڈی پورہ: پولیس نے جموں و کشمیر کے ضلع بانڈی پورہ میں لشکر طیبہ (ایل ای ٹی) تنطیم سے وابستہ دو عسکریت پسند معاون کو گرفتار کرنے کا دعویٰ کیا ہے۔ ایک پولیس ترجمان نے کہا کہ بانڈی پورہ پولیس نے فوج کے 14 آر آر اور سی آر پی ایف کی تیسری بٹالین کی ایک ٹیم کے ساتھ مل کر ایک ناکہ چیکنگ کے دوران سُملر میں فشریز فارم کے نزدیک لشکر طیبہ سے وابستہ دو عسکریت پسند معاون کو گرفتار کیا۔ انہوں نے کہا کہ گرفتار شدگان کی تحویل سے دو چینی ساخت کے گرینیڈ بر آمد کیے گئے۔ ان کا کہنا تھا کہ دونوں کے خلاف پولیس اسٹیشن بانڈی پورہ میں ایک کیس درج کیا گیا ہے اور ان سے پچھ گچھ کی جا رہی ہے۔
واضح رہے کہ اس سے قبل جمعرات کو سیکورٹی فورسز نے سوپور سے لشکر طیبہ کے ایک عسکریت پسند معاون کو گرفتار کیا اور اس کے قبضے سے اسلحہ اور گولہ بارود برآمد کیا تھا۔ گرفتار معاون کی شناخت عمر بشیر بٹ ساکن منز سیر کے طور پر ہوئی تھی۔ سکیورٹی فورسز کو علاقہ میں عسکریت پسندوں کی نقل و حرکت سے متعلق ایک مخصوص اطلاع ملی تھی۔ اطلاع ملتے ہی سوپور پولیس فوج کی 52 آر آر اور سی آر پی ایف کی 177 بٹالین نے محاصرہ کیا۔ تلاشی کے دوران ایک مشتبہ شخص کو روکنے کا اشادہ دیا گیا تاہم سکیورٹی فروسز کے دیکھتے ہی اس نے موقع سے فرار ہونے کی کوشش کی، تاہم سکیورٹی فورسز نے اسے گرفتار کرلیا تھا۔