پاکستانی پرچم لہرانے کے الزام میں تین افراد گرفتار

بانڈی پورہ پولیس نے ضلع حاجن علاقے میں پاکستانی پرچم لہرانے کے الزام میں تین افراد کو گرفتار کر لیا ہے۔

ایک پولیس عہدیدار نے بتایا کہ 6 ستمبر کو کچھ نامعلوم افراد نے حاجن قصبے کے عام لوگوں میں ملک مخالف جذبات کو ابھارنے اور انہیں مشتعل کرنے کی غرض سے پاکستانی پرچم لہرائے۔

عہدیدار نے بتایا 'اس سلسلے میں پولیس اسٹیشن حاجن میں ایک ایف آئی آر زیر نمبر 35/2020 درج کی گئی اور تفتیش کے دوران میر محلہ حاجن سے 3 افراد کو گرفتار کیا گیا تھا، جنہوں نے پرچم کشائی میں ملوث ہونے کا اعتراف کیا'۔

پاکستانی پرچم لہرانے کی اس کوشش کے الزام میں جن تین افراد کو گرفتار کیا گیا ان شناخت مجیب شمس ، تنویر احمد میر اور امتیاز احمد شیخ کے نام سے ہوئی ہے۔

ایک پولیس اہلکار نے ای ٹی وی بھارت کو بتایا کہ ملزمان کی تحویل سے کپڑے، سلائی کی مشین اور ایک ہینڈ گرینیڈ کے علاوہ دیگر قابل اعتراض چیزیں بھی برآمد کی گئی ہیں۔

انہوں نے مزید کہا کہ اس کیس کی مزید تفتیش جاری ہے۔