حاجن: متعدد مثبت کیسز کے بعد قصبے میں سخت سیکورٹی انتظامات

شمالی کشمیر کے قصبہ حاجن میں کووڈ 19 سے متاثرہ تصدیق شدہ کیسزس میں بدستور اضافہ ہوتا جا رہا ہے۔

شمالی کشمیر کے ضلع بانڈی پورہ میں سب ضلع سمبل کے حدود میں آنے والے اس قصبہ میں کورونا وائرس کے مثبت کیسز کی تعداد 30 تک پہنچ گئی ہے جبکہ بانڈی پورہ ضلع میں 33 افراد اس وبائی بیماری کے شکار ہیں۔

بتا دیں کہ قصبہ حاجن کے کئی علاقے پہلے سے ہی ریڈ زون قرار دئے گئے ہیں اور یہاں عوام کے نقل و حرکت پر سخت پابندیاں عائد ہیں تاہم لاک ڈاؤن کے باجود ہر گزشتہ دن کے ساتھ ساتھ نئے مثبت کیسز سامنے آرہے ہیں جو ضلع انتظامیہ کے ساتھ ساتھ عوام کے لئے بھی باعثِ تشویش بنا ہوا ہے۔

قابل ذکر ہے کہ جمعرات کو قصبہ حاجن کے گنڈ جہانگیر نامی علاقے میں ایک ہی خاندان کے 11 افراد اس وائرس سے متاثر پائے گئے ہیں۔

ضلع انتظامیہ کے ساتھ ساتھ پولیس اور سیکورٹی فورسز بھی جگہ جگہ تعینات ہے اور خارجی و داخلی راستوں کو سیل کر دیا گیا ہے۔ عبور و مرور پر پابندی ہے اور صرف ایمرجینسی کی صورت میں ہی چلنے کی اجازت دی جا رہی ہے۔