شمالی کشمیر کے ضلع بانڈی میں تحصیل آفس سوناواری کے احاطے میں ایک پٹواری نے ایک سرپنچ پر مبینہ طور پر حملہ کرکے اس کے ساتھ مار پیٹ کی۔
عینی شاہدین کےمطابق سنبل تحصیل کے ایک پٹواری ایاز احمد نے مبینہ طور پر شبیر حیدر نامی ایک سرپنچ کی سر عام مارپیٹ کی۔
بانڈی پورہ: پٹواری کے ہاتھوں سرپنچ کی مبینہ پٹائی، عوام کا احتجاج مذکورہ پٹواری کی حال ہی میں رکھ عشم پنچایت حلقے سے عوامی شکایت کے بعد دوسرے حلقے میں تبادلہ کیا گیا تھا۔
شبیر حیدر نامی سرپنچ نے ای ٹی وی بھارت کے ساتھ بات کرتے ہوئے کہا ’’پٹواری نے میرے ساتھ بدسلوکی اور مجھے سر عام گھسیٹا، میری مار پیٹ کی اور مجھے سر عام دھمکایا۔‘‘
اس واقعے کے بعد رکھ عشم پنچایت حلقہ کے لوگوں نے پٹواری کے خلاف احتجاج کیا اور اس کے خلاف کارروائی کرنے کا مطالبہ کیا۔
اس ضمن میں ای ٹی وی بھارت نے جب ایڈیشنل ڈپٹی کمشنر ظہور احمد سے رابطہ کیا تو انہوں نے کہا کہ وہ معاملے کی تحقیقات کرینگے اور اگر الزامات درست ثابت ہوئے تو ریونیو آفیشل کے خلاف کارروائی انجام دی جائے گی۔
