خستہ حال سڑک سے اٹھنے والے گرد و غبار سے عوام پریشان

ضلع بانڈی پورہ کے نوسو علاقے میں خستہ حال سڑک سے دکانداروں اور مقامی باشندں کو دقتوں کا سامنا کرنا پڑ رہا ہے۔

شمالی کشمیر کے ضلع بانڈی پورہ میں نوسو علاقے کی رابطہ سڑک انتہائی خستہ ہو چکی ہے، سڑک پر جگہ جگہ گہرے گڑھے بنے ہوئے ہیں وہیں خستہ حال سڑک پر سے اٹھنے والے گرد و غبار سے مقامی باشندوں اور دکانداروں کی زندگی اجیرن بن چکی ہے۔

نوسو کے باشندوں کا کہنا ہے کہ گزشتہ ماہ سڑک کی مرمت کے لیے ٹھیکہ دار نے باجری اور ریت سمیت دیگر مواد علاقے میں انڈیل دیا تاہم سڑک کی مرمت کا کام اب تک شروع نہیں کیا۔

انہوں نے کہا کہ سرینگر - بانڈی پورہ شاہراہ پر دن بھر فوجی کانوائی سمیت سینکڑوں گاڑیاں سفر کرتی ہیں، اور سڑک پر سے اٹھنے والے گرد و غبار سے انہیں کافی دقتیں پیش آتی ہیں۔

مقامی دکانداروں کا کہنا ہے کہ دن بھر اٹھنے والے گرد و غبار سے انکا مال تجارت بھی تباہ ہو چکا ہے جس کے باعث انہیں مالی نقصان سے دوچار ہونا پڑ رہا ہے۔

انہوں نے کہا کہ سڑک کی تعمیر و مرمت کے حوالے سے مقامی باشندوں نے محکمہ تعمیرات عامہ سے کئی بار رجوع کیا تاہم ’’عوام کے جائز مطالبات کو نظر انداز کیا جا رہا ہے۔‘‘

مقامی باشندوں نے متعلقہ محکمہ سمیت ضلع انتظامیہ سے سڑک کی مرمت کرانے کا مطالبہ کیا ہے۔