مرکزی وزیر مملکت پریتیما بھومک کا ضلع بانڈی پورہ کا دورہ

پبلک آؤٹ ریچ پروگرام کے تحت مرکزی وزیر مملکت پریتیما بھومک نے ضلع بانڈی پورہ میں کئی ترقیاتی منصوبوں کا افتتاح کرنے کے علاوہ عوامی وفود سے بھی ملاقات کی۔

مرکزی وزیر مملکت برائے سماجی انصاف اور امپاورمنٹ پریتیما بھومک نے مرکزی حکومت کی جانب سے جاری ’’پبلک آؤٹ ریچ پروگرام‘‘ کے تحت شمالی کشمیر کے ضلع بانڈی پورہ کا دورہ کیا۔

وزیر نے دورے کے دوران عوامی وفود سے ملاقات کی اور مختلف ترقیاتی منصوبوں کا افتتاح کیا۔ ان کے ہمراہ ڈپٹی کمشنر بانڈی پورہ ڈاکٹر اویس احمد، سینئر سپرنٹنڈنٹ آف پولیس، ڈائریکٹر جنرل سوشل ویلفیئر، سمیت کئی افسران موجود تھے۔

دورے کے دوران مرکزی وزیر مملکت نے 11.18 کروڑ روپے کی لاگت سے تعمیر کیے گئے ہائر سیکنڈری سکول، سمبل کے تعلیمی کمپلیکس کا افتتاح کیا۔

انہوں نے 18.79 لاکھ روپے کی لاگت سے دیہی علاقوں میں آبپاشی اور پانی کے تحفظ کے لئے تعمیر کیے گئے ترقیاتی منصوبے کا بھی افتتاح کیا۔

بعد ازاں وزیر مملکت نے ڈاک بنگلو، سمبل میں ایگزبشن اسٹالز کا بھی معائنہ کیا، جو مختلف محکموں نے ’’آزادی کے امرت مہاتسوو‘‘ کے تحت ان کی کارکردگی کو اجاگر کرنے کے لئے لگائے تھے۔