غیر قانونی طور پر قبضے میں لی گئی کاہچرائی کے خلاف مہم جاری رکھتے ہوئے ضلع بانڈی پورہ کے حاجن میں کئی مقامات پر تجاوزات کو ہٹا کر زمین کو بازیاب کیا گیا۔
اس موقعے پر تحصیلدار حاجن نے کہا کہ کئی روز قبل اس سلسلے میں انہیں شکایات موصول ہو رہی تھیں کہ علاقے میں سرکاری اراضی پر غیر قانونی طور پر قبضہ جمانے کی کوششیں جاری ہیں۔
شکایات موصول ہونے کے بعد تحصیلدار حاجن غلام محمد بٹ کی سربراہی میں ایک ٹیم نے گندبل نامی علاقے میں تجاوزات کے خلاف مہم شروع کی اور مذکورہ علاقے میں جمعہ کو پانچ کنال اراضی کو بازیاب کیا گیا جبکہ اس سے قبل بھی پانچ کنال کاہچرائی سے تجاوزات کو ختم کیا گیا۔
اس مہم کے دوران سرکاری اراضی پر نصب کیے گئے درجنوں درخت موقعے پر ہی کاٹ دیئے گئے اور ٹیم نے متعلقہ نائب تحصیلدار، گرداوار، پٹواری سمیت ریونیو کے عہدیداروں پر مشتمل ٹیم کی موجودگی میں غیرقانونی طور پر کی گئی شجرکاری کو ختم کیا اور اس دوران دیگر تجاوزات کی بھی نشاندہی کر لی گئی۔
ادھر مقامی لوگوں نے اس کارروائی کی سراہنا کرتے ہوئے مستقبل میں بھی ایسی کارروائیاں جاری رہنے کی امید ظاہر کی۔