بانڈی پورہ: حاجن میں کانگریس کی انتخابی مہم

حاجن میں تین انتخابی نشستوں پر ڈی ڈی سی انتخابات ہونے والے ہیں۔ حاجن علاقہ سال 2016 کے بعد سے سیکیورٹی کے لحاظ سے کافی حساس علاقہ مانا جاتا ہے۔

شمالی کشمیر کے ضلع بانڈی پورہ کے حاجن علاقے میں پردیش کانگریس کی جانب سے ایک روڈ شو کا اہتمام کیا گیا، جس میں پارٹی سے وابستہ سینئر رہنما امتیاز پرے کی صدارت میں حاجن کے مختلف علاقوں میں انتخابی مہم چلائی گئی۔ تشہیری مہم کے دوران ان کے ساتھ درجنوں پارٹی کارکنان نے روڈ شو میں حصہ لیا اور حاجن میں پارٹی کے منتخب امیدوار فرجیل احمد کے حق میں مہم چلائی۔

خیال رہے کہ حاجن میں تین انتخابی نشستوں پر ڈی ڈی سی انتخابات ہونے والے ہیں۔ قابل ذکر ہے کہ حاجن علاقہ سال 2016 کے بعد سے سیکیورٹی کے لحاظ سے کافی حساس علاقہ مانا جاتا ہے اور اکثر عسکری سرگرمیوں کے حوالے سے بھی خبروں میں رہا ہے تاہم ڈی ڈی سی انتخابات کو لیکر یہاں انتخابی سرگرمیاں کافی حد تک دیکھنے کو مل رہی ہے۔

امتیاز پرے نے اس موقع پر مدون سوناواری میں اپنے ایک خطاب میں ممبر پارلیمنٹ اور نیشنل کانفرنس کے سینئر رہنما محمد اکبر لون کو سخت تنقید کا نشانہ بناتے ہوئے کہا کہ انہوں نے دہائیوں سے یہاں کے غریب عوام کا استحصال کیا ہے لیکن آج 21 ویں صدی میں بھی یہاں پانی نہیں ہے۔ یہاں کی سڑکیں ویران ہیں اور پسماندگی عروج پر ہے۔

انہوں نے کہا کہ ایسے حالات اس بات کا تقاضہ کرتے ہیں کہ محمد اکبر لون کی جانب سے کھڑے کئے گئے امیدواروں کو شکست دینی ہے تاکہ یہاں ایسا امیدوار منتخب ہو جو آپ کے مسائل کے ازالے کے لئے کام کریں۔ انہوں نے لوگوں سے اپیل کی کہ وہ کانگریس پارٹی کے نامزد امیدوار فرجیل احمد کو کامیاب بنائیں۔