باںڈی پورہ ضلع ترقیاتی کمشنر نے تحصیل آفس کا دورہ کیا

باںڈی پورہ کے ضلع ترقیاتی کمشنر ڈاکٹر اویس احمد نے آتشزدگی سے خاکستر ہوئے تحصیل دفتر کا معائنہ کیا، انھوں نے کہا کہ تحصیل بانڈی پورہ اور اسکی ٹیم کی ہمت اور بہادری کی وجہ سے تحصیل آفس کے ریکارڈ کو محفوظ رکھنے میں کامیابی ملی ہے۔

جموں و کشمیر کے ضلع بانڈی پورہ میں ضلع ترقیاتی کمشنر ڈاکٹر اویس احمد نے معاون کمشنر ریونیو کے ہمراہ آتشزدگی سے خاکستر ہوئی تحصیل آفس بانڈی پورہ کا دورہ کیا، کمشنر نے تحصیل آفس کی عمارت کے ساتھ ساتھ دوسرے املاک کا بھی معائنہ کیا۔

تحصیل آفس کی عمارت میں دوسری منزل پر سی آر پی ایف کے بھی متعدد سازوسامان رکھے گئے تھے جو کہ آتشزدگی کی وجہ سے خاکستر ہوگئے، ضلع ترقیاتی کمشنر نے اسکا بھی معائنہ کیا۔

ضلع ترقیاتی کمشنر بانڈی پورہ ڈاکٹر اویس احمد نے کہا کہ خصوصا تحصیل بانڈی پورہ اور اسکی ٹیم کی ہمت اور بہادری کی وجہ سے تحصیل آفس کے ریکارڈ کو محفوظ رکھنے میں کامیابی ملی ہے۔

انہوں نے کہا کہ یہاں پر سی آر پی ایف بھی ایک احاطے میں کام کر رہی ہے جو کی پبلک سروسز کے لیے ٹھیک نہیں ہے جس کی وجہ سے بہت جلد سی آر پی ایف کے لیے متبادل جگہ کا انتظام کیا جائے گا۔

تحصیل آفس میں آتشزدگی کے حوالے سے ڈاکٹر اویس احمد نے کہا کہ ہم نے ایک کمیٹی تشکیل دی ہے، جیسے ہی تحقیقات مکمل ہوتی ہے، اس تعلق سے مطلع کیا جائے گا۔

واضح رہے کہ تحصیل آفس بانڈی پورہ کی عمارت میں پانچ دسمبر کو آگ لگنے کی وجہ سے کافی زیادہ نقصان پہنچا تھا۔