CO 14 RR condoles Slain Soldiers kins: فوجی افسر نے کی مہلوک فوجی کے لواحقین کے ساتھ ملاقات

شمالی کشمیر کے بانڈی پورہ ضلع سے تعلق رکھنے والے وسیم احمد ڈار، جو ضلع کے ایک بہترین فٹبالر بھی رہ چکے ہیں، سنہ 2014 میں فوج میں بھرتی ہوئے تھے اور حالیہ دنوں کولگام ضلع میں عسکریت پسندوں کے ساتھ پیش آئے انکاؤنٹر کے دوران ہلاک ہو گئے۔

بانڈی پورہ (جموں کشمیر) :فوج کی 14آر آر کے کمانڈنگ آفیسر (سی او) روہت بھٹ نے انکاؤنٹر کے دوران ہلاک ہوئے فوجی اہلکار وسیم احمد ڈار کے گھر جاکر لواحقین کے ساتھ تعذیت کا اظہار کرتے ہوئے فوج کی جانب سے انہیں ہر ممکن مدد فراہم کرنے کی یقین دہانی کی۔ وسیم ڈار شمالی کشمیر کے بانڈی پورہ ضلع سے تعلق رکھتے ہیں اور حال ہی میں وہ جنوبی کشمیر کے کولگام ضلع میں عسکریت پسندوں کے ساتھ پیش آئے تصادم کے دوران ہلاک ہو گئے تھے۔

سی او 14 RR روہت بھٹ نے وسیم احمد ڈار کے گھر جاکر ان کے والدین، بیوہ سمیت دیگر لواحقین کے ساتھ ملاقات کی۔ واضح رہے کہ وسیم احمد ڈار حال ہی میں کولگام ضلع میں پیش آئے ایک تصادم کے دوران ہلاک ہوئے تھے۔ کمانڈنگ آفیسر، روہت بھٹ نے حال ہی میں بانڈی پورہ میں 14 RR کے سی او کی حیثیت سے کمان سنبھالی ہے۔ واضح رہے کہ وسیم احمد ڈار 2014 میں فوج میں بھرتی ہوئے تھے۔ انکاؤنٹر کے دوران ڈار کی موت کی خبر سنتے ہی بانڈی پورہ کے باشندوں خاص کر فٹ بال کھلاڑیوں میں صف ماتم بچھ گئی کیونکہ وسیم احمد ضلع کے ایک بہترین فٹ بالر بھی رہ چکے تھے۔

مہلوک فوجی وسیم احمد کے لواحقین میں معمر والدین سمیت حاملہ زوجہ بھی شامل ہے۔سی او نے لواحقین کے ساتھ تعذیت پرسی کی انہیں فوج، حکومت کی جانب سے ہر ممکن مدد فراہم کرنے کے عزم کا اعادہ کیا۔ سی او کے ہمراہ 14 RR کے ٹاؤن ایریا کمانڈر سمیت فوج کے دیگر افسران بھی تھے۔ لواحقین سے بات چیت کے دوران انہوں نے کہا: ’’وسیم احمد نے ملک کی سالمیت کے لئے جام شہادت نوش کیا ہے اور فوج نہ صرف ان کی قربانی کو ہمیشہ یاد رکھے گی بلکہ شہید فوجیوں کے اہل خانہ کو بھی ہمیشہ یاد رکھے گی، اور ان کے ہر دکھ درد میں ان کے ساتھ شانہ بشانہ کھڑی رہے گی۔‘‘