عالمی وبا کورونا وائرس کے بڑھتے مثبت کیسز کے پیش نظر شمالی کشمیر کے ضلع بانڈی پورہ میں حکام نے ضلع میں عوامی مقامات پر فیس ماسک پہننا لازمی قرار دیا ہے۔
حکمنامے کے مطابق فیس ماسک کے بغیر پبلک مقامات پر پائے جانے والے افراد پر 200 روپے جرمانہ عائد کیا جائے گا جبکہ بار بار ایسا کرنے والے افراد پر 500 روپے تک کا جرمانہ عائد کیا جائے گا۔
حکمنامے میں مزید کہا گیا ہے کہ مرکزی وزارت صحت اور خاندانی بہبود، محکمہ ڈیزازسٹر منیجمنٹ کی جانب سے ماسک کے استعمال کی سختی سے تلقین کی گئی ہے اور عالمی وبا کے حالیہ مثبت معاملات کے پیش نظر وبا کو مزید پھیلنے سے روکنے کے لیے ماسک پہننا ناگزیر قرار دیا گیا ہے۔
انتظامیہ کی جانب سے جاری کردہ حکمنامے میں تمام ضلعی و سیکٹرل افسران کو اپنے ماتحت کام کرنے والے دفاتر میں ماسک کے استعمال کو یقینی بنانے کا پابند بنایا گیا ہے۔