شمالی کشمیر کے ضلع بانڈی پورہ کے کئی دیہات میں دھان کے کھیتوں میں پانی کی قلت کے سبب فصلیں تباہی کے دہانے پر پہنچ گئی ہیں۔
کسانوں کا کہنا ہے کہ دھان کے کھیتوں میں پانی کی شدید قلت کے باعث پنیری سوکھ جائے گی جس سے ان کی پوری فصل تباہ ہو جائے گی۔
ای ٹی وی بھارت کے ساتھ بات کرتے ہوئے مقامی کسانوں نے بتایا کہ حال ہی میں انہوں نے دھان کی پنیری لگائی ہے اور ان دنوں فصلوں کو پانی کی اشد ضرورت ہے تاہم سینچائی کا معقول انتظام نہ ہونے کے سبب زمین خشک ہو رہی ہے جسکی وجہ سے فصلوں کے تباہ ہونے کا خدشہ لاحق ہے۔
ضلع بانڈی پورہ میں سوناواری علاقے کے نیسبل، شگن پورہ، شلوت، ونگی پورہ، گامرو، گنڈ سمیت کئی دیہات میں کسانوں کو پانی کی شدید قلت کے سبب مشکلات کا سامنا کرنا پڑ رہا ہے۔ ان کے مطابق اگر کھیتوں کو جلدی پانی نہیں پہنچایا گیا تو فصلیں سوکھ جائیں گی۔
ادھر اس سلسلے میں میکنینل اری گیشن محکمہ کے ایگزیکٹو انجینئر نے ای ٹی وی بھارت کو بتایا کہ بجلی کی عدم دستیابی کے سبب انہیں بھی سینچائی کے لیے پانی مہیا کرانے میں دقتیں پیش آ رہی ہیں۔ تاہم انہوں نے کہا کہ جس علاقے میں کھیتوں کے سوکھ جانے کا خدشہ لاحق ہے وہاں جنگی بنیادوں پر سینچائی کا انتظام کیا جائے گا۔