بانڈی پورہ: میونسپل انتظامیہ سمبل کی جانب سے کوڑے دان کی تقسیم

ضلع بانڈی پورہ کے سمبل علاقے میں میونسپل کمیٹی کی جانب سے کوڑے دان، اسٹریٹ لائٹس اور ریڈیاں تقسیم کی گئیں۔

شمالی کشمیر کے ضلع بانڈی پورہ کے سمبل قصبہ میں میونسپل انتظامیہ کی جانب سے لوگوں میں کوڑے دان تقسیم کیے گئے تاکہ لوگ آس پاس کوڑا کرکٹ پھینکنے کے بجائے کوڑے دان کا استعمال کریں۔

سمبل میونسپل انتظامیہ کی جانب سے علاقے کو صاف ستھرا رکھنے کے لیے کی گئی پہل کے تحت لوگوں میں کوڑے دان تقسیم کئے گئے، نیز انہیں روزانہ ڈسٹ بن استعمال کرنے کی ہدایت بھی دی گئی۔

اس کے علاوہ میونسپل انتظامیہ نے سٹریٹ لائٹس اور ریڑیاں بھی تقسیم کیں تاکہ علاقے کو گندگی سے صاف رکھنے کے علاوہ خوبصورت بھی بنایا جائے۔

سمبل میونسپل کمیٹی کے دفتر پر اس سلسلے میں ایک تقریب کا انعقاد کیا گیا جس دوران سمبل میونسپل کمیٹی کے دائرہ اختیار میں آنے والے الگ الگ وارڈز سے تعلق رکھنے والے لوگوں کو یہ اشیاء فراہم کی گئیں۔

اس موقع پر میڈیا نمائندوں سے بات کرتے ہوئے ٹریڈیرس فیڈریشن کے جنرل سیکرٹری نے بتایا کہ وہ میونسپل کمیٹی سمبل کے انتہائی شکر گزار ہیں جنہوں نے علاقے کو مزید صاف ستھرا بنانے کے لئے کوڑے دان تقسیم کئے۔

انہوں نے کہا کہ اکثر لوگ گھروں کے اندر صفائی کا خیال رکھتے ہیں لیکن وہ گھر کا سارا کچرا باہر پھینکتے ہیں جس کی وجہ سے گلی کوچوں اور چوراہوں پر گندگی پھیل جاتی ہے۔