Slain Solider Laid to Rest کولگام فائرنگ میں ہلاک ہونے والا اہلکار فوجی اعزاز کے ساتھ سپرد خاک

فوجی اہلکار وسیم احمد کو اتوار کے روز ان کے آبائی علاقہ داچھی گام بانڈی پورہ میں فوجی اعزار کے ساتھ سپرد خاک کیا گیا۔ وسیم احمد کو گزشتہ جمعہ کے روز کولگام میں عسکریت پسندوں کی فائرنگ میں جاں بحق ہوگئے تھے۔

بانڈی پورہ: جنوبی ضلع کولگام کے جنگلی علاقے میں سکیورٹی فورسز اور عسکریت پسندوں کے مابین تصادم آرائی میں جاں بحق ہوئے فوجی وسیم احمد بٹ کی داچھی گام بانڈی پورہ میں اتوار کے روز فوجی اعزاز کے ساتھ آخری رسومات ادا کی گئی جس میں لوگوں کی ایک بڑی تعداد نے شرکت کی۔

اطلاعات کے مطابق کولگام تصادم میں جاں بحق ہوئے فوجی اہلکار وسیم احمد بٹ ساکن داچھی گام بانڈی پورہ کی لاش اتوار کے روز جوں ہی ان کے آبائی گاؤں پہنچائی گئی تو وہاں کہرام مچ گیا اور خواتین سینہ کوبی کرنے لگیں۔

ایک قریبی رشتہ دار نے بتایا کہ وسیم احمد بٹ کی جسد خاکی اتوار کی صبح فوجی ہسپتال سرینگر سے آبائی گاوں داچھی گام بانڈی پورہ پہنچائی گئی۔انہوں نے بتایا کہ فوج، پولیس اور سی آر پی ایف کے اعلیٰ عہدیداروں کے ساتھ سینکڑوں مقامی لوگوں نے وسیم احمد کی آخری رسومات میں شرکت کی۔

ان کے مطابق فوجی آفیسران نے وسیم احمد کو شاندار الفاظ میں خراج عقیدت ادا کرکے ان کی بہادری کو سراہا ۔مہلوک فوجی اہلکار کی شادی نومبر 2021 میں انجام پائی اور عید کے روز وہ چھٹی پر گھر آیا تھا۔ وسیم احمد کی بیوی چھ ماہ کی حاملہ ہے۔وسیم کے پسماندگان میں اہلیہ کے علاوہ والدین، ایک بھائی اور دو شادی شدہ بہنیں شامل ہیں۔

واضح رہے کہ جمعے کے روز کولگام کے ہالن جنگلی علاقے میں عسکریت پسندوں نے فوج پر گھات لگا کر حملہ کیا جس کے نتیجے میں تین اہلکار شدید طورپر زخمی ہوئے اور بعد ازاں ان کی ہسپتال میں موت واقع ہوئی۔معلوم ہوا ہے کہ جنگلی علاقے میں اتوار کے روز بھی تلاشی آپریشن جاری رہا۔