خستہ حال سڑک کو قابل استعمال بنانے کی اپیل

شمالی کشمیر کے ضلع بانڈی پورہ میں لاوے پورہ کو وترنہ علاقے سے ملانے والی خستہ حال سڑک سے مقامی باشندوں کو دقتوں کا سامنا کرنا پڑ رہا ہے۔

ضلع ہیڈ کوارٹر بانڈی پورہ سے محض چار کلومیٹر دور لاوے پورہ کو وترونہ علاقے سے ملانے والی سڑک کی حالت اتنی خستہ ہے کہ عام لوگ اس پر چلنے سے کتراتے ہیں۔

مقامی آبادی نے انتظامیہ کو تنقید کا نشانہ بناتے ہوئے کہا: ’’اگر آس پاس دیگر علاقوں کی سڑکوں کو میگڈمائز کیا گیا تو کیا وجہ ہے کہ اس اہم لنک روڈ کو نظرانداز کیا گیا؟‘‘

لاوے پورہ - وترونہ کی خستہ حال سڑک دونوں دیہات کے لئے کافی اہمیت کی حامل ہے، کسانوں کو کھیتوں تک، طلباء کو اسکول اور مریضوں کو اسپتال اسی سڑک سے ہوکر گزرنا پڑتا ہے۔

ای ٹی وی بھارت کےساتھ بات کرتے ہوئے مقامی باشندوں نے کہا: ’’خستہ حال سڑک پر عام ایام میں بھی چلنا مشکل ہوتا ہے، تاہم بارشوں اور برفباری کے دوران عبور و مرور نا ممکن بن جاتا ہے۔‘‘

انہوں نے مزید کہا کہ خستہ حال سڑک پر کئی حادثات بھی رونما ہوئے ہیں جن میں متعدد افراد زندگی بھر کے لیے اپاہج ہو گئے۔

لاوے پورہ - وترونہ کی خستہ حال سڑک کو جلد سے جلد قابل استعمال بنانے کی مقامی باشندوں نے انتظامیہ کی اپیل کی۔