بانڈی پورہ: خستہ حال سڑک سے لوگوں کو عبور و مرور میں دقتوں کا سامنا

شمالی کشمیر کے ضلع بانڈی پورہ میں اندرکوٹ سے گنڈ نوگام، سوناواری کو جانی والی اندرونی سڑک انتہائی خستہ ہو چکی ہے جس کے سبب لوگوں کو عبور و مرور میں دقتوں کا سامنا کرنا پڑ رہا ہے۔

ضلع بانڈی پورہ کے سمبل تحصیل سے منسلک اندرکوٹ کی رابطہ سڑک کئی دیہات کو آپس میں جوڑنے کا کام کرتی ہیں اور اس نوعیت سے دیکھا جائے تو ایک اہم سڑک ہیں لیکن یہ سڑک دھول اور مٹی سے پُر ہے جس کی وجہ سے لوگوں کو چلنے پھرنے میں دشواریوں کا سامنا کرنا پڑ رہا ہے۔

مقامی لوگوں نے بتایا کہ سڑک میں جگہ جگہ بڑے اور گہرے گھڑے بن گئے ہیں جس کی وجہ سے سڑک پر چلنا دشوار کن ہوتا جا رہا ہے۔ انہوں نے ضلع انتظامیہ سے سڑک کی تعمیر و مرمت کے علاوہ میگڈمازیشن کا بھی مطالبہ کیا ہے۔

انہوں نے کہا کہ خشک موسم میں گرد و غبار اور بارشوں اور برفباری کے دوران کیچڑ سے مقامی باشندوں خاص کر طلبہ کو سڑک پار کرنے میں مشکلات کا سامنا رہتا ہے۔

مقامی باشندوں نے بتایا کہ انہوں نے اس سلسلے میں پہلے بھی کئی دفعہ انتظامیہ سے سڑک کی تعمیر و مرمت کا مطالبہ کیا تاہم انکے مطابق متعلقہ محکمہ سمیت ضلع انتظامیہ نے عوام کو راحت پہنچانے کے لیے سنجیدہ اقدامات نہیں اٹھائے۔

انہوں نے محکمہ تعمیرات عامہ سمیت ضلع انتظامیہ سے سڑک کی میگڈمائزیشن کرنے کی اپیل کی۔