بانڈی پورہ: تیندوے کے حملے میں کمسن بچہ زخمی

ضلع بانڈی پورہ میں جمعرات کو دیر شام ایک تیندوے کے حملے میں کمسن بچہ شدید زخمی ہو گیا۔

شمالی کشمیر کے ضلع بانڈی پورہ کے صدرکوٹ بالا علاقے میں ایک تیندوے نے 4 سالہ کمسن بچے پر حملہ کر کے اسے شدید زخمی کر دیا۔

ایک عہدیدار نے بتایا کہ ارحان شبیر ولد شبیر احمد نام کے ایک کمسن بچے پر اپنے گھر کے قریب جمعرات کی شام تیندوے نے حملہ کر دیا۔

حملہ کے فوراً بعد اہل خانہ کی چیخ و پکار سن کر مقامی افراد موقع پر پہنچ گئے اور بچے کو تیندوے سے چھڑایا۔

تیندوے کے حملے میں کمسن بچہ شدید زخمی ہو گیا اور اسے فوراً حاجن اسپتال پہنچایا گیا۔

حاجن اسپتال میں ابتدائی طبی امداد کے بعد اسے مزید علاج کے لئے ایس ایم ایچ ایس ہسپتال سری نگر ریفر کر دیا گیا۔

قابل ذکر ہے کہ حالیہ ایام میں جنگلی جانوروں خصوصا تیندوے کے حملوں میں متعدد افراد ہلاک جبکہ متعدد زخمی ہو گئے۔

چند روز قبل وسطی کشمیر کے ضلع گاندربل کے ززنہ علاقے میں تیندوے نے 3سالہ کمسن بچی پر حملہ کرکے اسے ابدی نیند سلا دیا تھا۔