شمالی کشمیر کے ضلع بانڈی پورہ کے حاجن میں ڈسٹرکٹ لیگل سروس اتھارٹی بانڈی پورہ کی جانب سے پنچوں اور سرپنچوں کے لئے ایک آگہی پروگرام کا انعقاد عمل میں لایا گیا۔
اس موقع پر بلاک حاجن سے وابستہ درجنوں پنچوں اور سرپنچوں نے پروگرام میں حصہ لیا اور پنچایتی راج سے متعلق مختلف حقوق اور قوانین کے بارے میں معلومات حاصل کیں۔
اس پروگرام کا انعقاد ڈسٹرکٹ لیگل سروس اتھارٹی بانڈی پورہ نے بلاک ڈیولپمنٹ حاجن کے اشتراک سے کیا تھا، جس کا مقصد پنچوں اور سرپنچوں کو مختلف حقوق اور قوانین سے متعلق جانکاری فراہم کرنا تھا۔
پروگرام کے دوران ڈاکٹر مرتضی، بلاک میڈکل آفیسر حاجن، اور ایڈووکیٹ عابد حسین نے پنچوں اور سرپنچوں کو پنچایتی راج کے تعلق سے مختلف قوانین اور انہیں حاصل اختیارات سے آگاہ کیا تاکہ وہ اپنے متعلقہ پنچایتی حلقوں میں ان تراکیب اور ہدایات کو اپنا کر پنچایتی راج کو مضبوط کرسکیں۔
